Dimishiq (SLpost)- Afhayeen u hadlay xukuumadda Suuriya oo lagu magacaabo Mr. Shariif Shahada, ayaa ku eedeeyey dawlada Qatar iyo dalka Mareykanka in ay ka dembeeyaan diidmada ay madaxda isbahaysiga mucaaridka ee dalkaasi ku qaaddaceen ka qeyb- galka wada-hadal siyaasadeed oo lala yeesho xukuumadda Suuriya.
Mr. Shariif oo shalay warbaahinta kula hadlay caasimadda Suuriya ee Dimishiq, waxa uu sheegay in madaxda isbahaysiga mucaaridku aanay dan ka lahayn dhibta dadka soo gaadhaysa iyo burburka ay dagaaladu ku keenayaan dalka.
Geesta kale, isbahaysiga mucaaridku waxa ay diidmadooda ka qeyb galka kulanada siyaasadeed iyo kuwa dibloomasiyadeed sabab uga dhigeen bulshada caalamka gaar ahaan Ruushka iyo Mareykanka oo waxba ka qaban waayey gantaalaha, madaafiicda iyo bombooyinka ay la dhacayaan ciidamada xukuumadu magalooyinka Suuriya siiba magaalada Xalab.
Isbahaysiga Mucaaradka ee ka soo horjeeda Dawladda Suuriya, ayaa ku dhawaaqay qorshe ay Dawlad-goboleed kaga aasaasayaan qaybta dhulka gacanta ugu jira ee dalkaas.
Afhayeen u hadlay mucaaradka ayaa Jimcihii ku dhawaaqay qorshahaas wakhti ay magaalada Qaahira ugu sugnaayeen shirar ay kaga tashaneyeen inay wada-hadallo la bilaabaan xukuumadda Bashar Al-Assad, waxaanu afhayeenkaasi sheegay in isbahaysiga mucaaradku 2 Bisha March ku kulmi doonaan magaalada Istanbul ee dalka Turkiga isla markaana ay dooran doonaan Raysalwasaare meteli doona maamulkooda.
Somalilandpost.net/Hargeysa
