Xukuumadda Madaxweyne Biixi oo dib ula soo noqotay Maamulka iyo Bixinta Adeegyadii Liisanka iyo Sumadda Gaadiidka

 

Hargeysa (SLpost)- Madaxweynaha Somaliland Md Muuse Biixi Cabdi, ayaa wareegto uu maanta soo saaray waxa uu ku buriyey heshiis laba shirkadood oo gaar loo leeyahay hore loogu wareejiyey Bixinta iyo Samaynta adeegyada Buugga Dhaq-dhaqaaga Gaadiidka iyo Summadda Tirsiga Gaadiidka.

Xukuumaddii Madaxweyne Siilaanyo, ayaa bixinta adeegyada Liisanka iyo Lambarka Tirsiga hore ugu wareejisay Laba shirkadood oo lagu kala magacaabo Hodan Enterprise iyo GTS, kuwaas oo si gaar ah u soo daabici jiray Liisanka gaadiika iyo Sumadda Tirsiga Gaadiidka.

Wareegtada Madaxweynaha ayaa lagu sheegay in xukuumaddu la wareegtay gebi ahaanba maamulka iyo Bixinta adeegyada Sumadda iyo Buugga lahaanshiyaha Gaadiidka, waxaanu madaxweynuhu qiimeynta Kharasha Maalgelintii ku baxday oo loo celiyo labada shirkadood ee adeegyadan bixin jirtay loo xil-saaray Lix hay’adood oo ka tirsan dowladda, kuwaas oo kala ah wasaaradaha Gaadiidka, Ganacsiga, Wershadaha, Maaliyadda, Hanti-dhowrka Guud iyo Xisaabiyaha Guud.

Wareegtada madaxweynaha ayaa u qornayd sidan:- “Madaxweynaha Jamhuuriyadda Somaliland, Mudane Muuse Biixi Cabdi waxa uu wareegto madaxweyne oo summadeedu tahay JSL/XM/WM/222-394/122019, ku soo saaray La-wareegidda Buugga Dhaq-dhaqaaga Gaadiidka (Circulation Book) iyo Summadda Tirsiga Gaadiidka (Plate Number).

Waxaanay u dhignayd Wareegtada Madaxweynuhu Sidan:-

Wareegto Madaxweyne

Markaan Arkay: Qodobka 90aad ee Dastuurka Jamhuuriyadda Somaliland;
Markaan Arkay: Qodobka 14aad, faqraddiisa 1aad iyo Qodobka 54aad, faqraddiisa 1aad ee Dastuurka;
Markaan Arkay: Xeerka Wada-marista Gaadiidka Xeer Lr. 56/2013;

Markaan Garwaaqsaday: In daryeelka iyo Hantida Guud ay tahay waajib saaran Xukuumadda, hantidaas oo haddii loo baahdo lagu wareejin karo oo keli ah, si sharciga waafaqsan, sida ku cad qodobka 12aad ee Dastuurka Dalka;

Markaan Xaqiiqsaday: La soo noqoshada Hantida Dawladdu muhiimadda ay leedahay, maadaama aanu jirin Xeerka Iskaashiga Dawladda iyo Ganacsiga Gaarka ah (PPP Act);

Markaan dersay: Muhiimadda ay leedahay in gacanta dawladda lagu soo celiyo hanti ahaan iyo maamul ahaanba Buugga Dhaq-dhaqaaga Gaadiidka (Circulation Book) iyo Summadda Tirsiga Gaadiidka (Plate Number);

Markaan Helay: Talo soo-jeedinta Guddida Dhaqaalaha iyo Horumarinta ee Heer Qaran iyo Tallo Bixinta Sharci ee heshiisyadii dhex-maray Xukuumadda iyo Shirkadaha Hodan Enterprise iyo GTS;

Waxaan Go’aamiyey;

1) In la buriyey heshiisyadii lagu wareejiyey adeegyada; Buugga Dhaq-dhaqaaga Gaadiidka (Circulation Book) iyo Summadda Tirsiga Gaadiidka (Plate Number).

2) In Xukuumaddu gebi ahaanba la soo noqotay maamulkii, gacan-ku-hayntii, adeegii iyo qalabkii Buugga Lahaan-shaha Gaadiidka iyo Summadda Tirsiga Gaadiidka (Plate Number).

3) In Wasaaradda Gaadiidka iyo Horumarinta Jidadka, Wasaaradda Ganacsiga, Warshadaha iyo Dalxiiska, Wasaaradda Horumarinta Maaliyadda, Xafiiska Hanti-dhawraha Guud iyo Xafiiska Xisaabiyaha Guud ay keenaan qiimaynta dhabta ah ee dhaqaalaha ay Shirkadaha Hodan Enterprise iyo GTS ku maal-geliyeen Buugga Dhaq-dhaqaaga Gaadiidka (Circulation Book) iyo Summadda Tirsiga Gaadiidka (Plate Number), iyaga oo dersaya qiimaha ay hadda suuqa ka marayaan marka ay cusub yihiin, isla markaana ka jaraya wixii duugaw ah (Depreciation).

4) In Wasaaradaha iyo Hay’adaha ay khusaysaa ka gutaan waajibaadkooda sharci ee fulinta qodobbadan kor ku xusan.

5) In Shaqaalihii ka hawl-galayey adeegyadani ay shaqadooda u sii wadanayaan si caadi ah.” Sidaas ayay u qornayd wareegtada Madaxweynaha Jamhuuriyadda Somaliland.