Hargeysa (SLpost)- Xisbiga Mucaaradka ah ee Waddani, ayaa kasoo horjeestay go’aan xukuumadda Somaliland ku joojisay soo-dejinta gaadiidka Vitz-ta oo arrimo dhinaca ammmaanka ah iyo shilalkooda oo batay awgeed loo joojiyey in dalka la keeno.
Golaha Wasiirrada Somaliland, ayaa kulan ay todobaadkii hore yeesheen ku go’aamiyey in la joojiyo soo-dejinta gaadiidka Vitz-ka iyo Gaadiidka dhinaca Bixi ku leh Shookaanta.
Sidoo kale, Wasiirka Wasaaradda Gaadiidka iyo Horumarinta Jidadka oo ka hadlay sababta xukuumaddu u soo saartay go’aanka ee loo bartilmaameedsaday gaadiidka Vitz oo ka mid ah gaadiidka dadweynaha ee qaybta laxaadka leh ka qaata adeegyada bulshada, waxa uu sheegay inaanu go’aankani dhaqan-geli doonin xilligan oo ay wakhti siinayaan isla markaana aanu saamayn ku yeelan doonin gaadiidka xilligan ku sugan gudaha dalka iyo kuwa soo saaran maraakiibta. Muddadaas wixii ka dambeeyana si rasmi ah loo hirgelin doono go’aanka.
Xoghayaha Arrimaha bulshada ee Xisbiga Waddani, Maxamed Sidiiq Cabdilaahi oo warbaahinta la hadlay, ayaa sheegay in gaadiidka Vitz-ku waxtar badan u leeyahay bulshada isla markaana ay dhalinyaro tiro badani shaqo-abuur ka heleen oo ay kaga badbaadeen inay dalka ka tahriibaan sidaas awgeed go’aankaasi yahay mid aan loo baahnayn.
Muuqaalka Hoose kaga Bogo Hadalka Masuulka Xisbiga Waddani ee Arrintan ka hadlay
Isagoo arrimahan ka hadlayey, waxa uu yidhi, “Tallaabada joojinta gaadiidka VITZ-ta waa go’aan dawladnimada ka arradan oo muujinaya axmaqnimo iyo arxandarro maamul. Xukuumaddu waxay u taqaan VITZ-ta gaadhi aan manfac lahayn, shacabkuna waxay ogyihiin in V8-ka wasiirradu ku raaxaystaan aanu manfac inoo lahayn dhaqaale ahaan.”
“Waxa ku nool kumanaan qoys, waxa shaqo abuur ka helay dhallinyaro badan, VITZ-tu waxay badbaadisay bilaa camal badan oo Tahriibi lahaa.” Sidaas ayuu yidhi Maxamed Siddiiq.
Dhinaca kale, waxa go’aanka ka soo horjeestay Siyaasi Maxamuud Cali Saleebaan (Ramaax) oo ka tirsan Xisbiga mucaaradka ah ee UCID, waxaanu sheegay inay xukuumadda ku deg-degtay go’aanka ay dalka kaga joojinayso gaadiidka Vitz-ka, isagoo ku dooday in go’aankaasi saamayn ku yeelanayo ganacsato muwaadiniin ah oo gaadiidka soo dejiya.
Muuqaalka Hoose ka daawo Siyaasi Ramaax oo ka hadlay Arrintan iyo Qodobbo kale
Siyaasi Ramaax oo warbaahinta kula hadlay isagoo ku sugan magaalada Boorama ee xarunta gobolka Awdal, waxa uu ku dooday in nolosha qoysas iyo dhalinyaro tiro badan ku tiirsan tahay gaadiidka Vitz-ka.
Somalilandpost.net
contact@somalilandpost.net
