Hargeysa (SLpost)- Xisbiga Mucaaradka ee UCID, ayaa xukuumadda Madaxweyne Siilaanyo ugu baaqay inay faragelinta siyaasadeed ka deyso Shirka HODAALE ee beelweynta Sacad Muuse uga furmaya degmada Agabar ee Gobolka Gabiley.
Xisbiga UCID waxa uu si weyn u soo dhaweeyey qabsoomidda shirkaas oo ay ku tilmaameen mid wanaag iyo isu soo dhawaansho u horseeda beelaha kale ee ku dhaqan Somaliland, isla markaana shirkaasi la mid yahay shirarkii ay qabsadeen beelaha kale ee ku dhaqan Somaliland.
Sidaasna waxa lagu sheegay war-saxaafadeed ka soo baxay Xafiiska Xoghaya Arrimaha Gudaha ee Xisbiga UCID, kaas oo qornaa sidan:-
“Waxaa mudan in marka hore aanu halkan salaan uga soo gudbino guud Shacabka qaaliga ah ee reer Somaliland ,meelkastoo ay joogaan dibada iyo gudahaba.Salaan ka dib waxaanu aaminsan nahay in Shacabka reer Somaliland ay masuul ka yihiin ilaalin —-adkeeyan nabada –wada tashiga iyo horumarka guud ee dalka Somaliland.
Sidaa daraadeen Xisbiga Daryeel iyo Cadaalada(UCID),wuxuu halkan ku cadeynayaa :-
1. Waxaanu si buuxda u soo dhoweynayaa,una taageeraynaa Xisbi ahaan Shirka Beesha Sacad –Muuse ,ee loo bixiyey « Hoodaale »,kaas oo la qorsheeyey in uu ka furmo doono degmada Agabar ,ee gobolka Gabilay 18.08.2013.
2. Xisbiga UCID,wuxuu u arkaa shirkaas mid ay xaq u leeyihiin Beeshu,danaha u gaarka ahna ay Beeshu,kaga tashanayso.Waa u ducaynaynaa in uu ugu qabsoomo,uguna dhamaado nabad gelyo, warka ka soo baxaana uu noqdo mid Beesha ,Beelaha kale iyo guud ahaan Somaliland waxtara.
3. Xisbiga UCID,wuxuu ku baaqayaa in shirka la daayo fara-gelinta carqaladeynta . Waa xaqiiqa in ay Beeshu xaq u leedahay in ay danaheeda ka shirto sidii Beelaha kaleba uga shireen danahooda,ugana shirdoonaan mustaqbalka.”
ALLAA MAHAD LEH
Abdi M.Saleiman(Mingiste)
Xoghayaha.Arimaha Gudaha iyo Xidhiidhka Gobolada.