Hargeysa (SLpost)- Xisbiga talada haya ee Kulmiye iyo Xukuumaddisa, ayaa maalinta Berri ah munaasibad maalmihii u dambeeyey dhaq-dhaqeeqada la dareemayey ku soo dhaweynaya Guddoomiyaha Golaha Deegaanka Berbera Md Cabdi-Shakuur Maxamuud Xasan (C/shakuur Ciddin) iyo xubno ka tirsan Golaha deegaanka Berbera oo u diga-roganaya Xisbiga talada dalka haya.
Wefti ballaadhan oo isugu jira Hoggaanka Sare ee Xisbiga Kulmiye iyo Wasiirro Xukuumadda ka tirsan, ayaa shalay magaalada Berbera ugu amba-baxay ka-qayb-galka munaasibadda soo-dhawaynta ah ee Kulmiye u samaynayo Maayarka degmada Berbera Cabdishakuur Ciddin oo Xisbiga Mucaaradka ah ee UCID uga soo baxay degmada Berbera doorashadii Goleyaasha deegaanka.
Munaasibaddan oo lagu qaban-doono xarunta Dawladda Hoose ee Berbera, ayaa sidoo kale lagu soo dhaweyo xubno ka mid ah golaha deegaanka Berbera, kuwaas oo la sheegay inay Isku xisbi ka soo wada-baxeen Maayarka Magaalada Berbera, waxaana lagu wadaa inay ka soo qayb-galaan Guddoomiyaha Xisbiga Kulmiye & ku-xigeennadiisa, Wasiirro xukuumadda ka socda oo uu horkacayo wasiirka arrimha Gudaha, siyaasiyiin, Madax-dhaqameed iyo qaybaha bulshada gobolka Saaxil.
Lama oga sababta Maayarka Berbera uga diga-roganayo Xisbiga Mucaaradka ah ee UCID oo doorashadii deegaanka ku guulaystay aqlabiyadda mudaneyaasha golaha deegaanka Berbera ee ka soo kala baxay Ururradii hadhay iyo Saddexda Xisbi Qaran, balse waxa ay noqonayshaa guushii u horreysay ee Xisbiga talada haya ee Kulmiye ka gaadho hanashada guddoomiyeyaasha Goleyaasha Deegaanka ee ka soo kala baxay Xisbiyada Mucaaradka ah.
Hoggaanka Golaha Deegaanka Xarunta Dhaqaalaha Somaliland ee Berbera, ayaa ku astaysan ka mid noqoshada iyo taageerada hadba xisbiga hoggaamiyaha talada dalka, waxaana loo fasiran karaa tallaabada maayar Cabdishakuur ugu diga-rogtay Xisbiga Xukuumadda inay tahay dariiqa kaliya ee ay ku mataanoobi karaan Mansabka uu ka hayo degmada Berbera iyo nidaamka wada-shaqayneed ee Xukuumadda talada haysa, iyada oo muddooyinkii u dambeeyey Xisbiga uu ka soo jeedo ee UCID uu mucaaradad xooggan kala horyimi Xukuumadda Kulmiye.
Maayarkii hore ee magaalada Berbera Md Cabdalle Maxamed Carab oo wakhtiii xukuumaddii Madaxweyne Rayaale ka tirsaana Xisbigii hoggaaminayey talada dalka ee UDUB, ayaa sidan kale ugu biiray xisbiga Kulmiye markii talada dalka qabsaday, ka hor intii aan la qaban doorashadii goleyaasha deegaanka ee dabayaaqadii sannadkii 2012-dii ka dhacday dalka.
Xisbiga Kulmiye ayaa hor u hantay Maayarka degmada Burco Md Maxamed Muraad oo ka soo baxay Urur-siyaasadeedkii RAYS ee ku hadhay tartankii doorashada goleyaasha deegaanka, kaas oo ku biiritaankiisa xisbiga talada dalka haya ku shaaciyey maalmo ka dib markii loo doortay maayarnimada magaalada Burco.
SOMALILANDPOST.NET
contact@somalilandpost.net
