Hargeysa (SLpost)- Wejiga saddexaad ee dhismaha jidka Dawga-cad oo lagaga dhigayo laami, ayaa maanta si rasmi ah loo bilaabay, ka dib muddo sannad ka badan oo shaqao adagi ka socday waddadaas oo Magaalada Hargeysa ku xidha xeebta Galbeed, isla markaana ay ka dhici jireen shilal baabuur oo sababay masiibooyin keenay dhimasho iyo dhaawac badan oo joogto ahaa.
Guddida dhismaha Dawga-cad, ayaa maanta shaaca ka qaaday in ay bilaabeen qorshaha samaynta jidka laamiga ah oo dhan illaa 15 KM , iyada oo ay si fudud isticmaali doonaan gaadiidka isaga kala goosha Somaliland iyo dalka Djibouti.
Eng Cali Cabdi Sarajoog oo ka mid ah guddida dhismaha, ayaa sheegay in la diyaariyay qalabkii lagu fulin lahaa dhismaha, waxaana ay taasi sahli doontaa isu socodka gaadiidka iyo dadweynaha, waxaana uu mahadceliyay dhamaan dadkii ka qaybgalay hawshaas .
“Wadada waxa la dhigay jiida iyo jaygii Daamurka la dulsaari lahaa , waxa isku dhaafi kara laba, saddex gaadhi, inta aanu imika laamiga dhigaynaa waa Buurta Dawga-cad, ka dib waa la dhamayn doonaa , Hargeysa waxa looga socon doonaa in ka yar saacad, xeebtana saacad uun, dadku waxa ay ku iman doonaan Badda laba saacadood,iyada oo aan laami ta Berbera la mid ah la isticmaalayn , waa ay ku soo dabaalan doonaan. Hawl adag ka dib maanta waa wax wanaagsan la arkay, dadkii lacagta bixin jiray waxa aanu leenahay qaadhaanka ha kala jarina, waa horumarkii dhulkiina” ayuu yidhi Eng Cali Sarajoog.
Axmed Xaashi oo ka mida Qurba-jooga dalka Norway , ayaa ugu baaqay jaaliyadaha Somaliland ee taageeray dhismahan wadadan in ay sii wadaan dadaalkooda, iyaga oo la xaqiijiyay yoolkii la beegsanayay.
“Waxa aan halkan kala hadlayaa dadkii Qurba-jooga ahaa ee ka qaybgalay fududaynta wadada , waxa aan filayaa in loo baahan dhaqaale , waa aynu ka qayb qaadanaa dhismaha dalkeena , iyada badan ayaa yidhaahda wadadii la dhamaystirin , cidi waxba kama qabto dadbaa yara xaadh-xaadhaya , indhihiina ayaad ku arkaysaan laamidiibaa la saarayaa , anigu waxa aan ka imid Norway, waxa aan rejaynayaa in reer Norway waxa aan gaadhsiin doonaa fariintaydii marka aan ku laabto” ayuu yidhi Axmed Xaashi.
Dhismaha jidka Dawgacad oo ka dhici jireen shil galaaftay nolosha dad badan oo u kala safrayay Magaalooyinka Hargeysa iyo Djibouti, ayaa la bilaabay bishii Augus ee sannadkii 2011-kii , waxaana hindisihiisa lahaa dad isugu jiray haween ragga ganacsato ah oo dalka ku sugan.
