Hargeysa (SLpost)- Wasiirka Wasaaradda Duulista Hawadda iyo Gaadiida Cirka Somaliland Md. Maxamuud Xaashi Cabdi, ayaa shaaca ka qaaday in go’aan midaysan laga gaadhay xal-u-helidda muranka dhinaca Maamulka Hawada ee u dhexeeya Somaliland iyo Somaliya, isla markaana laysla qaatay in sannadka soo socda si rasmi ah loogu wareejiyo maamulka hawada Sare Guddi Farsamo oo ka kooban labada waddan.
Wasiirka Duulista Hawada oo maanta war-fidiyeennada kula hadlay garoonka diyaaradaha ee Hargeysa ka dib socdaal muddo todobaad ah qaatay oo uu ku gaadhay dalka Turkiga oo uu kaga qayb-galay shir lagaga hadlayey maamulka dhinaca hawada ee dal-weynihii laysku odhan jiray Soomaaliya.
Md Maxamuud Xaashi oo ugu horeyn faahfaahinayey natiijadii shirkaas iyo waxyaabihii lagu go’aamiyey, waxa uu yidhi, “Shirkan waxa isu yimid laba guddi farsamo oo ka socday Somaliland iyo Soomaaliya, waxana arintaas lagu go’aamiyey shirkii ugu dambaayey ee labada dal ay Horaantii sanadkan Istaanbul ku yeesheen sideed qodob oo ka soo baxay ayaa mid aan uu dhigayey in laba guddi farsamo la samaayo si loo gu’anaanado arintii hawada maamulkeeda loona wadaago, lana sameeyo wax la yidhaa TOR, (Terms of Reference), oo ay ku shaqeeyaan guddida hawada maamulaysaa, masuuliyada iyo xilka naloo igmaday oo sidaas ayuu ahaa, waxaanu labadayadii dhinac isugu nimid Istanbul, waxana kulan noo abaabushay wasaarada arimaha dibada ee Turkiga,” ayuu yidhi Wasiirku waxaanu intaas ku daray, “xaqiiqdii arintaas markii aanu falanqaynay ee shirkii uu noo bilaabmay midho dhal badan lagama gaadhin sababtana waxa keentay iyada oo kadinkii laga soo galay hawsha qaabdhismeedka inaanu diyaarino, aanu ku kala aragti duwnaanay walaaladayadii guddi farsaxo ee ka yimid Soomaaliya, xubno khubro ah ayaa meesha marayey laba dhinacba, aniga iyo Wasiirka kale kor joogto ayaanu ahayn, waxa lagu kala duwanaaday guddi loo baahan yahay in la sameeyo.”
“Somaliland xubnahayagii ka socday waanu qabnay imikana aanu qabnaa kuna qanacsanahay in shirkii Istanbul ka dhacay 7 ilaa 9 July/2013-kii, ee ugu horeeyey wadahadii Labada dal, in laga heshiiyey in la sameeyo guddi wadaag ah, oo arinta hawada si madax banaan u maamula fadhiisinkooduna uu noqdo caasimada Somaliland ee Hargeysa, xafiiska Nairobi ee FIR la yidhaa in loo soo raro Hargeysa, anaga laba xafiis nooma ay kala ahayn, ilaa hada waxaanu qabtaa inaanu arintaas heshiis ku ahayn Soomaaliya, waxa dhacday in Walaalhayo Soomaaliya ay la gole yimaadeen fahan kaas ka duwan, oo ah in guddidani ay samayso guddi kale oo farsamo gudidaasina waxa ay ku shaqnayso aanu isla meel dhigno, xafiiska FIR-na aanu ajandaha meelbana ka soo galin, angug taas waanu ka soo hor jeednaa waayo laba guddi cidna samaymayso, mashruucani waa mid kaliya oo isla socda, doodayaduna abbaar ayey leedahay waxa weeye guddi kaliya ayaa hawadda maamulaysa, oo gacanta ku haynaysa, hadii ay tahay hawl maalimeedka joogtada ah, wadaaga cashuurta ama dhaqaalaha, dajinta istaraatijiyada iyo siyaasada waxaas oo dhan hal guddi oo hal xafiis leh ayaa maamulaysa, ayaanu aamin san nahay halkaas ayaanu ku kala duwanahay Soomaaliya.”
Wasiirka Duulista Somaliland Md. Maxamuud Xaashi ayaa sheegay in dooda Soomaaliya ee ah in la kala saaro gudidda hawada maamulamaysa iyo xafiiskeeda ay u arkaan mid khilaafsan heshiiskii hore ee hawadda ee labada dal galeen waxaanu yidhi, “Dooda Soomaaliya ee Qodobkaasi waxaanu u aragnaa in uu ka soo horjeedo heshiiskii hore ee aanu galnay, waana aanu isku marganay, mahaa wax u baahan in laga qariyo Bulshada Somaliland, saxaafadda iyo beesha caalamkaba, way nagu adkaaday in aanu heshiis gaadhno, waxa aanu markaas gunaanadkii isku afgarana laba qodob oo ah Kow, waxaanu garwaaqsanay in baahi weyn loo qabo in hawadii mamaulkeedii dib loogu soo celiyo gacmaha Soomaaliyada, Somaliland iyo Soomaaliya, waxana aanu mudaynay in bisha January 2015 hawadii UN gacanteeda laga soo noqdo, hawaasna ay maamulaan guddi wada jir ah oo ah labada dhina, guddidaasna ay la xisaabtamaan laba dawladood ee Somaliland iyo Soomaaliya.”
Wasiirka Waxa safarkiisa ku wehelinayey Siciid Mahdi Ileeliye (Saqiiro) iyo Maxamuud Biixi Taar-wale ah khubaro ku xeel-dheer dhinaca Hawada (Aviation) oo ka tirsan Wasaaradda Duulista Hawada Somaliland.
SOMALILANDPOST.NET
