Hargeysa (SLpost)- Wasiirka Wasaarada Dhallinyarada Ciyaaraha iyo Dhaqanka ee Somaliland Mudane Cali Siciid Raygal oo uu Weheliyo Taliye ku xigeenka Ciidanka Asluubta Xasan Cali Cawad ayaa galabta tababar u furay kooxda kubadda cagta ee ku ciyaarta magaca ciidanka asluubta si u iyaguna tabobar ugu fidiyaan maxaabiista ku jirta xabsiyada dalka.
Waxaa tababarkan soo qaban qaabiyay ururka Waayo-arag, iyagoo gudoonsiiyay qalab ay ugu talo galeen inay ku ciyaaraan kooxda kubada cagta ee Ciidanka Asluubta.
Taliye ku xigeenka ciidanka asluubta Xasan Cali Cawad oo ugu horayn halkaasi ka hadlay ayaa u mahadceliyay waxtarka balaadhan ee ururka Waayo-arag la garab-joogo kooxda ku ciyaarta magaca ciidanka asluubta taas oo wax weyn ka taraysa ayuu yidhi sidii kor loogu qaadi lahaa xirfada iyo aqoonta kooxdan.
Taliye ku xigeenku waxa uu sheegay in arintani ay la xidhiidho hawlaha dhaqan celinta ee ay ka wadaan Xabsiyada Wadanka, isagoo tusaale u soo qaatay warshad ay dhawaan u fureen maxaabiista ku jirta xabsiga mandheera, ujeedada laga leeyahayna ay tahay sida uu yidhi in maxaabiistu marka ay xukunkooda dhamaystaan ay bulshada kula soo dhex noqdaan maskax fayow iyo xirfado ay noloshooda ku maareeyaan.
Gudoomiyaha ururka Waayo arag Axmed Maxamed Xasan “Sawaaxili” ayaa sheegay in Tababarkani uu noqonayo kii Kontanaad ee ay u fidiyaan dhalinyarada ku hawlan ciyaaraha kubada cagta,waxaanu xusay in gobolada Togdheer iyo Sanaag oo qudha aanay tagin isla markaana ku rajo weyn yihiin inay dhawaan tababaro noocan oo kale ah ka soo qabtaan.
Wasiirka Wasaarada Dhallinyarada Ciyaaraha iyo Dhaqanka ee Somaliland Mudane Cali Siciid Raygal ayaa uga mahad celiyay ururka Waayo-arag ee isu xilqaamay sidii ay dhalinyarada ku hawlan mihnada ciyaaraha aqoontooda kor ugu soo qaadi lahaayeen,Wasiirku waxa uu ku booriyay bah’da ciyaaraha Somaliland inay ka fogaadaan ficilada xun xun ee nusqaanta ku ah ciyaaraha sida Qabyaalada,iyo balwadaha oo dhaawac ku ah mustaqbalka ciyaartoyga.
Mudane Cali Siciid Raygal waxa uu intaas ku daray in Xukuumada uu ka tirsan yahay ay ka go’an tahay sidii ay wax ula qaban lahayd dhalinyarada, isagoo kula dardaarmay kooxda kubada cagta ee ciidanka asluubta sidii ay uga faa’iidaysan lahaayeen mudada uu tababarkani u socdo,duruusta ay ka kasbadaana ay ku dabaqaan xirfadooda ciyaareed isla markaana la qorshaynayo sidii ay ugu gudbin lahaayeen maxaabiista xabsiyada ku jirta inta karaankooda ah.
SLpost News/Hargeysa
