London (SLpost)- Dokumentiyo sir ah oo laga helay ninka Sirdoonka Maraykanka ka fallaagoobay ee Edward Snowden, ayaa daaha ka fayday Hawl-galo qarsoodi ah oo Dawladda Maraykanku ku Basaasi jirtay telefoonada ay adeegsadaan 35 ka mid ah hoggaamiyeyaasha waddamada Adduunka. Sida ay daabacday Jariiradda Guardian ee ka soo baxda Dalka Ingiriiska.
Sarkaal sare oo ka tirsan Dawladda Maraykanka, ayaa hay’adda Ammaanka Qaranka ee dalkaas u gudbiyey 200 oo telefoon oo ay ku jiraan hoggaamiyeyaasha waddamada qaaradaha Yurub iyo Eeshiya.
Xogta laga helay dokumentiyada Sirta ah ee ninkani faafiyey, ayaa intaas ku daray in Shaqaalaha Aqalka cad, Wasaaradaha Arrimaha Debedda iyo Gaashaan-dhigga lagu booriyey inay isu gudbiyaan macluumaadyada lagula xidhiidho Siyaasiyiinta dalaka kala duwan ee caalamka.
XAALADDA YURUB OO KACSAN KA DIB FASHILAADDA BASAASIDDA MARAYKANKA
Afhayeen u hadlay Aqalka cad oo ka jawaabcelinayay warbixintan debedda u soo baxday, ayaa dafiray inuu Maraykanku qaaday tallaabo ka baxsan hawlaha xog-raadinta dalalka caalamka. “Munaasib maaha inaanu warnaahinta ka sheegno wax kasta oo lagu eedeeyo hawlaha sirdoonka, siyaasad ahaana waxaanu si cad u sheegnay in Maraykanu ururiyo xogta sirdoonka dibadda ee waddamada caalamka oo dhami sameeyaan,” ayuu yidhi afhayeenka u hadlay dawladda Maraykanka.
Wararka la xidhiidha basaasida Maraykanka ee dalalka debedda ayaa soo if-baxay ka dib markiu dawladda Jarmalku ka dalbaday Maraykanka inuu jawaabo ka bixiyo eedaymo la xidhiidha in dhegaystay telefoonka Raysalwasaaraha Jarmalka Angela Merkel, taas oo noqonaysa boogtii ugu xumayd ee samaysa xidhiidhka labada dal muddo toban sanno ah.
Aqalka Cad ee Maraykanka looga Arrimiyo muu beenin eedayntan, balse waxa uu ku dooday inaanay dhici doonin mar dambe.
“Mid ka mida dhacdooyinkii u dambeeyey, sarkaal Maraykan ah ayaa hay’adda Ammaanka Qaranka (NSA) u gudbiyey 200 oo telefoon Lambar oo ay ku jiraan 35 hoggaamiye ee caalamka ah,” ayaa ka mid ahaa qoraal ku xardhanaa waraaq ka mid ah dokumentiyada sirta ah ee la fashiliyey, kuna taariikhaysneyd bishii Oktober 2006-dii, taas oo uu soo xigtay Wargeyska Guardian.
In kasta oo aan la aqoonsan siyaasiinta lays weydiinayo, haddana Jariiradda Guardian waxa ay tibaaxday in basaasidda noocan ahi ay ka baaxad weynaan karto inta markii hore loo malaynayey, iyada oo la qorsheeyey in arrintan lagaga tashado Shir ay magaalada Brussels ku yeelanayaan Waddamada ku bahoobay Midowga Yurub oo ay ugu miisaan culus yihiin dalalka Jarmalka iyo Faransiiska.
Somalilandpost.net
London
