MUSCUT (SLpost)- Inta la ogyahay Ugu yaraan 27 qof ayaa dhintay ka dib markii Doon ay saarnaayeen 200 oo Muhaajiriin African ahi ay maanta ku qarraqantay badda Mediterranean-ka ee u dhaxaysa Africa iyo Yurub, sida uu xaqiijiyey Raysal-wasaaraha dalka Malta. Maraakiib ay leeyihiin Ciidamada Talyaaniga iyo Malta oo taageero ka helaya diyaaradaha qumaatiga u kaca, ayaa ka hawl-galay badbaadinta dadka nolosha tahriibayaasha oo la warhelay wakhti ay qorraxdu sii dhacaysay. Raysalwasaaraha dalka Malta, Joseph Muscat, ayaa sheegay in la babaadiyey 203 ka mid ah tahriibayaasha doontoodu degtay.
Doontan ayaa la sheegay inay ku qarraqantay meel 120 KM u jirta Xeebta jasiiradda Lampedusa ee Talyaaniga, taas oo todobaadkii hore dhacdo noocan oo kale ay ku dhinteen 300 oo tahriibayaal ah ka dib markii ay degtay doontii ay saarnaayeen oo sidday 500 oo qof. Doonta Maanta qarraqantay, ayaa la rumaysan yahay inay dhibaatadu haleeshay wax ka hor intii aanay qorraxdu dhicin. Wararka laga helay dhacdadan, ayaa sheegaya inay dadka doonta saarnaa ay dhinac isugu urureen iyaga oo doonayay inay u dhowaaqaan diyaaras dushooda maraysay, taas oo sababtay inay doonidu qarraqanto.
Ciidamada cirka ee Malta ayaa la sheegay inay arkeen doonta oo sii dagaysa, waxaanay isla markiiba ogeysiiyeen Maraakiibta ilaalada xeebaha Talyaaniga oo weli gaardiyeynaya xeebaha dalkaas ka dib dhacdadii dadka badan ku dhinteen todobaadkii hore. Ciidamada badda dawladda Malta, ayaa ka qayb qaadanaya hawlgalka oo ka dhacaya xuduudkeeda biyaha badda. Saraakiisha Malta waxa ay xaqiijeen in 147 qof oo la badbaadiyey ay saaran yihiin markab ay leeyihiin ciidamadooda ilaalada xeebaha, kuwaas oo la geynayo dalka Malta. Waxa kale oo ay sheegeen in ciidamada Talyaanigu badbaadiyeen 56 qof oo kale.
Wakaaladda wararka Talyaaniga ee ANSA ayaa shaacisay inay dhacdadan ku dhiteen 50 qof, balse ma jiro war si rasmi ah u xaqiijinaya jiritaanka warkaas.
Sidoo kale, may suurtagelin in markiiba la ogaado waddamada ay ka soo kala jeedan Tahriibayaasha Doonta saarnaa. Shabakadda Somalilandpost, ayaa maanta daabacday war la xidhiidha laba doonyood oo ku cilladoobay biyaha badda Liibiya, kuwaas oo midkood ay saaran yihiin 120 Somali ah, halka doonta kale oo ay saaran yihiin 100 Eretarian ah, kuwaas oo qaylo-dhaan u dirtay ciidamada ilaalada Xeebaha Talyaaniga, haseyeeshee ma jiraan warar xaqiijinaya in dadkaas la badbaadiyey iyo in kale.
Somalilandpost
MUSCUT
