Hargeysa (SLpost)- Guddoomiyaha Xisbiga Mucaaradka ah ee Waddani Cabdiraxmaan Maxamed Cabdilaahi (Cirro) iyo wefti ballaadhan oo masuuliyiinta xisbiga ka tirsan, ayaa maalinta Berri ah la filayaa inay gobollada Bari ee dalka ugu baxaan socdaal dhoola-tus siyaasadeed ah oo xisbigu ku soo bandhigayo cududdiisa taageero isla markaana ku soo dhawaynayo taageerayaal cusub oo ku soo biiri doona.
Socdaalka Guddoomiyaha Waddani ku galaa-bixinayo magaalooyin ka tirsan gobollada Bari ee dalka, gaar ahaan magaalooyinka Berbera, Sheekh, Burco iyo Oodweyne, ayaa la filayaa inuu qaato muddo dhowr maalmood ah, isaga oo safarkiisa ka bilaabi doona magaalooyinka Berbera iyo Sheekh oo maalinta Berri ah kaga qayb-geli doono munaasibad xisbigu ku soo dhawaynayo taageerayaal uga soo diga-roganaya Axsaabta kale ee siyaasadda.
Sida ay ila-wareedyo ka tirsan Xisbiga Waddani u xaqiijiyeen shabakadda Somalilandpost, safar guddoomiye Cirro iyo xisbigiisu maalinta Berri ah galaa-bixinayaan gobollada Beri ee dalka oo qaadan doona muddo Afar maalmood ah, ay habeen u hoyan doonaan magaalada Sheekh ee gobolka Saaxil ka dib munaasibado la qorsheeyey inay kaga qayb-galaan magaalooyinka Berbera iyo Sheekh, waxaanay maalinta Salaasadda ee todobaadkan ku beegan yihiin magaalada Burco halkaas oo ilaa shalay gelinkii dambe laga dareemayey diyaar-garowga soo-dhawaynta weftiga Gudoomiye Cabdiraxmaan Maxamed Cabdilaahi oo Xarunta gobolka Togdheer kulamo kala duwan kula yeelan doono taageerayaasha Xisbiga iyo Qaybaha kala duwan ee bulshada gobolkaas.
Xogaha la xidhiidha socdaalka Guddoomiye Cirro waxa ay intaas ku dareen inuu Guddoomiyuhu Safarkiisa ku soo Af-meeri doono magaalada Oodweyne ee xarunta gobolka Daad-madheedh oo uu kaga qayb-galayo munaasibad xisbigu taageeraal cusub ku soo dhawaynayo.
Guddoomiyaha Xisbiga Waddani oo isla markaana ah Guddoomiyaha Golaha Wakiillada, ayaa la sheegaya inuu socdaalkiisa gobollada Bari soo gunaanado maalinta Jimcaha ee todobaadkan oo uu ku soo laaban doono magaalada Hargeysa, sida ay noo xaqiijiyeen masuuliyiin ka tirsan Xisbiga Waddani.
Socdaalka Cabdiraxmaan-Cirro ee gobollada Bari oo u muuqda dhoola-tus siyaasadeed oo Xisbiga Waddani ku muujinayo Cududdiisa taageero, ayaa ku soo beegmaya laba todobaad dib safar noocan oo kale oo wefti ballaadhan oo uu hoggaaminayaa ku galaa-bixiyeen gobollada Galbeedka, gaar ahaan magaalooyinka Gabiley iyo Boorama, halkaas oo xisbigu xaflado ugu sameeyey taageerayaal cusub oo uga diga-rogtay xisbiga talada haya ee Kulmiye.
Sidoo kale, waxa uu guddoomiyuhu safarkan uga faa’idaysanayaa dib-u-dhac muddo todobaad ah dib loogu dhigay Kalfadhiga 26aad ee Golaha Wakiillada oo ku muddeysnaa inuu furmo Sabtidii shalay, haseyeeshee go’aan shir-guddoon oo ka shidaal-qaadanaya Wax-qabadka kalfadhiga oo qabyo ah, iyada oo dib loogu dhigay inuu Furmo maalinta Sabtida ee todobaadka soo socda oo ku beegan uun maalin ka hor marka uu guddoomiyuhu soo gebo-gabeeyo safarka uu ku marayo gobollada Saaxil, Togdheer iyo Daad-madheedh.
SOMALILANDPOST.NET
