Waxaan salaamayaa akhristayaasha sharafta badan ee maqaalkan waqtiga u huray, Anigoo ogsoon in ay jiraan khubaro iyo aqoonyahan aan taladu seegi karini inay dalka ka buuxaan isla markaana ay geli doonaan xalka labadan dawladood ee mudada dheer isa saaran iyagoo aan wax munaafacaad ah isku qabin.
Horta ugu horayn Waa in dadka reer somaliland ogaadaan isla markaana aduunyada kale ka dhaadhiciyaan inaanu jirin imika dawladii aynu la midawnay 1960kii, sababtu waxa weeye 1960kii wixii ka horeeyey waxaynu ahayn Somaliland halka koonfurtana la odhan jiray Somalia, waxa la aasaasay qaran labaduba ku midaysan yihiin oo loo bixiyey (Somali Republic) waxa la sameeyey Pasport rasmiya dalku yeesho waxaana la sameeyey dastuur iyo shuruuc dalku yeesho.
Markii dawladii kacaanku qabsatay waxa magicii dhexda lagaga daray kelmada “Democratic” waxaana laga dhigay (Somali Democratic Republic ) waattii kacaankii ay jebiyeen jabhadihii ay SNM hormoodka u ahayd.
Sida aad maaanta ogtihiin waxay koonfurtii la soo noqotay magacoodii ahaa (Somalia) isla markaana waxay bedeleen magicii Somali Democratic Republic waxaanay u rogeen Somalia Federal government iyagoo bedelay Nidaamkii oo dawladii ahyd jamhuuriyada ka dhigay nidaam maamul goboleedyo ah (federal) ah, halka ay sidoo kale bedeleen Pasportkii dalku lahaa waxay kale oo samaysteen dastuur cusub iyo axdi sharciyeed kumeelgaadha.
Sidoo kale reer somaliland waxay la soo noqdeen magocoodii hore ee (SOMALILAND) waxay kale oo sida koonfurtu samaysay yeesheen Pasport u gaara iyo dastuur iyo sharci rasmiya oo ay kaga duuwan yihiin Somalia, waxaanay nidaamkii ka dhigteen koodii hore ee jamhuuriyada isla markaana waxay qaateen Habdimuqraadi ah.
Hadaba waxa loo baahan yahay in aduunka loo sheego inaynaan weligeen ka mid noqon wax Somaaliya la yidhaahdo isla markaana aynaan ka qayb qaadan nidaamkan cusub ee ay qaateen baasboorkooda iyo sharcigoodana ay iyagu isticmaalaan ee aynaan inaku ka qayb qaadan.
Waxay muujinaysaa taasi inaynu dib ukala noqonay labadii dal ee aynu hore u kala ahayn wallow ay iyagu mageceenii guud ku adeeganayaan ee dawladnimo maadaama magaalo madaxdii dalku ku taalo halkaas.
Isku soo duuboo waxa loo baahan yahay in aynu garteena dabada ku sii akhrisano u gudbino oo soo bandhigno dhibkii iyo xasuuqii bulshadeena loo geystay iyo sida aynu uga soo kabanay isla markaana geedka lala tago go’aanka shacbigeena ee ah inay muqadas tahay Somaliland jiritaankeeda iyo goosashadeedu.
Qalinkii Iyo Qormadii
Suleymaan Cabdisitaar Dubad
Hargeysa Somaliland
00252-2-4430873
cabdisitaar@hotmail.com
