Hargeysa (SLpost)- Madaxweynaha Somaliland Md Muuse Biixi Cabdi, ayaa maanta kulan la yeeshay masuuliyiin ka socota Sanduuqa Horumarinta Mashaariic ee Britain (UKAID) iyo Shirkad lagu magacaabo TradeMark East Africa (TMEA).
Dowladda Ingriiska ayaa bixinaysa maal-gelinta dhismaha Jidka Hargeisa Bypass oo qayb ka ah mashruuca Jidka Berbera Corridor, waxaana qandaraaska dhismahan jidkan fulinaysa shirkadda TMEA oo xarunteedu tahay magaalada Nairobi ee dalka Kenya.
Sida lagu sheegay war-saxaafadeed ka soo baxay Xafiiska madaxtooyada Somaliland, Madaxweyne Muuse Biixi iyo weftiga Dowladda Ingiriiska oo ay weheliso shirkadda TMEA, ayaa ka wada-hadlay dar-dar gelinta dhismaha Jidadka Berbera Corridor iyo Hargeisa ByPass.
War-saxaafadeedka ka soo baxay madaxtooyada Somaliland, ayaa u qornaa sidan:-
“Madaxweynaha Jamhuuriyadda Somaliland, Mudane Muuse Biixi Cabdi oo kulan la qaatay masuulin ka kala socda xafiiska horumarinta mashaariicaha Dalka Uk, shirkada Trade Mark East Africa (TMEA) iyo xafiiska Dowladda UK ay ku leedahay Jamhuuriyada Somaliland.
Waxaana kulankaa lagaga wada hadlay dardar-gelinta dhismaha waddada Berbera Corridor oo isku xidhi doonta, marin ganacsiyeedka Tog-wajaale iyo Berbera, oo ay barbar socoto dhismaha waddada Hargeisa Bypass. Sidoo kale waxa laga wada hadlay mustaqbalka wixii la iska kaashan karo ee ay ka mid tahay horumarinta kaabayaasha ganacsiga.
Waxa kale oo lagu lafo-guray kulankaasi qodobo ay ka mid yihiin horumarinta kastamyada waa weyn ee kuyaala xuduudaha dalk, si loo fudaydiyo Allaabooyinka ganacsi ee isaga gudbaya dalalka Geeska Afrika iyo fursadaha kale ee maalgashi ee la xidhiidha horumarinta ganacsiga iyo kaabayaasha dhaqaale.
Waxaana madaxweynaha kulankaasi ku wehelinaayey wasiirradda wasaaradaha Qorshaynta iyo Horumarinta Qaranka, mudane Cumar Cali Cabdillaahi Bade,      Gaadiidka iyo Horumarinta Jidadka mudane Cabdirisaaq Ibraahim Maxamed Ataash, Ganacsiga iyo Dalxiiska, Mudane Maxamuud Xasan Sacad (Saajin).
Dhinaca masuuliyiinta madaxweynuhu qaabiley waxay kala yihiin, Frank Matsaert, Dominic McVey, Damon Bristow, Chris Loughran, Stuart Brown, Abdi Osman iyo Cris Pym.” Sidaas ayaa lagu yidhi War-saxaafadeedka ka soo baxay madaxtooyada Somaliland.
Madaxweynaha Somaliland Md Muuse Biixi Cabdi oo ay weheliso Safiirka Dowladda Ingriiiska Kate Foster, waxa uu bishii May ee sannadkan dhagax-dhigay dhismaha Jidka Hargeisa Bypass oo ah Waddo dhererkeedu dhan yahay 22.5km oo ka bilaabmaysa Kaantaroolka Halleeya ee Bariga Hargeysa, kuna dhammaanaysa Cusbitaalka Shifo oo ku yaalla Galbeedka Hargeysa, iyadoo oo dhinaca woqooyi ka maraysa magaalada Hargeysa.
Waddadan oo Qayb ka ah Dhismaha Berbera Corridor, ayaa ujeeddadeedu tahay sidii magaalada Hargeysa looga leexin lahaa Gaadiidka Xamuulka ah ee Badeecadaha iyo Alaabooyinka dekedda Berbera ka soo dega u sida Dalka Ethiopia.
Somalilandpost.net
contact@somalilandpost.net
