Hargeysa (SLpos)- Dawladaha Jamhuuriyadda Somaliland iyo Federaalka Itoobiya, ayaa ku heshiiyey in qiimaha qaadka iyo khudaarta lagu celiyo sidoodii hore, kadib qiimo-kordhin beeralayda Itoobiyaanku sameeyeen dhowaan.
Waxa kale oo labada dawladood ka wadahadleen dekedda Berbera, balse war rasmi ah kama soo saarin.
Wefti ay horkacayaan Wasiirka Gaadiidka iyo Saadka Itoobiya marwo Dagmawit Moges iyo La-taliyaha Amniga Qaranka Ra’iisal-wasaaraha Itoobiya mudane Redwan Hussien oo safar aan la shaacin ku tegay caasimadda Hargeysa shalay Arbacadii, ayaa xukuumadda Somaliland kala heshiiyey qiimaha qaadka iyo khudaarta.
Heshiiskan oo lagu kala saxeexday maanta Caasimada Somaliland ee Hargeysa, waxa dhinaca Itoobiya ku matelayey la-taliyaha dhanka amniga ee ra’iisal Wasaaraha Itoobiya Redwan Hussien, waxaana nuxurkiisu ahaa xal-u-helista qiima korodhka ku yimi cashuuraha laga qaado qaadka iyo khudaarta, waxaana heshiiskaasi Somaliland u saxeexay Wasiirka Wasaaradda arrimaha dibeda iyo iskaashiga caalamiga Somaliland Dr. Ciise Kayd Maxamuud Raagsaalle.
Wasiirka arrimaha dibada Dr. Ciise Kayd Maxamuud ayaa sheegay in qodobada lagu heshiiyay ay kala yihiin:-
- Somaliland Itoobiya waxay aqoonsadeen ahmiyada ay leedahay xidhiidhkii soo jireenka ahaa labada dhinac ka dhaxeeyay.
- In maanta oo bishu 7.7.2022 tahay in qiimihii qaadka iyo khudaarta qiimihii hore loo dejiyay, isla markaana ay ku noqoto sidii hore ee ay ahaan jirtay.
- In la sameeyo guddi farsamo oo ka hortagta dhibaatooyinkaasi oo kale sameysana daraasad si xal loogu helo arrimaha noocaas oo kale ah.
- Labada dhinac waxa ay ku heshiiyeen in la sii wado heshiisyadii sii loo dhammeeyo kuwii xagga baayac-mushtarka, isu-socodka gaadiidka iyo arrinta dekadda Berbera oo ku saleysan heshiisyo hore-u-dhacay, in halkaasi laga siiwado wada hadaladii.
Ganacsatada qaadlayaasha ee Somaliland, ayaa sheegay 26kii bishii June ee la soo dhaafay in ay joojinayaan qaadka Itoobiya, isla markaana u leexanayaan Yemen iyo Kenya, kadib markii Itoobiya ay kordhisay qiimaha qaadka.
Qiimaha qaadka ee la kordhiyey ayaa Itoobiya joojin doontaa kadib heshiiska cusub ee labada dal wada gaadheen maanta.
Dhinaca kale, weftiga sare ee ka socda Dawladda Federaalka Itoobiya, ayaa kulan la yeeshay Madaxweynaha Jamhuuriyadda Somaliland Md Muuse Biixi Cabdi oo ku qaabilay qasriga Madaxtooyada gelinkii dambe ee Khamiista maanta.
Follow us On
