Hargeysa (SLpost)- Waxa abaalmarino lacageed shalay la guddoonsiyay 30 arday oo ka qaybgalay tartan aqooneed Diini ah oo toddobaadkan lagu soo gabagabeeyay Maasjidka Quba ee Magaalada Hargeysa.
Tartanka dhalinyaradan oo muddo casharo ku saabsan barashada Taariikhda Islaamka ku baranaysay Masaajidkaas, waxa daruustiisa bixinayay Sheekh Maxamuud ( Aadan Siiro) oo sannadkasta bisha Ramadaan casharada ka bilaabay Masaajidka Quba.
Waxaana uu Sheekhu abaamarino lacageed guddoonsiiyay 30 dhalinyaro ah,iyada oo tiradu ay sannadkan ka badan tahay tii sannadihii hore oo ahayd 20 qof, waxaana taasi sabab u noqotay dhalinyarada oo doonaya in ay kor u qaadaan fahamka Diinta iyo barashada taariikhda Islaamka
“ Ujeeda aynu ka leenahay hore yaynu u tilmaanay midi waa in aynu ku noolayno dadkii wanaagsanaa ee saalixiinta ahaa ee Ilaahay Qur’aanka ku sheegay . dadkaa Ilaahay Qur’aanka ku sheegay ee la leeyahay Ilaahay raali buu ka noqday iyagun raali bay ka noqdeen in aynu noolayno noloshoodii oo aynu ku dayano iyo in aynu Ramadaanta ictikaaf ku noolayno yay muhimadu ahayd , jaa’isadan waa wax kooban oo aynu ugu talagalnay oo xaqal ciidka uun ah “ ayuu yidhi Sheekh Aadan
Waxa kaalimaha hore ka galay tartankii Siirada .
1- Cabdiwaaxid Cumar Sheekh Mubaarak oo helay dhibco dhan %91., waxa uu helay lacag dhan 600,000 SL SH
2- Axmed –Daahir Ibraahim Cali oo keenay dhibco ah %90, waxaana uu qaatay 500. 000 SL SH.
3- Cabdixakiim Daa’uud Ciise waxa uu keenay dhico %89 waxa uu qaatay lacag dhan 400,000.
Waxa kale oo iyana lacagta abaalmarinta qaatay 27 qof oo kale.
SOMALILANDPOST.NET
Hargeysa, Somaliland
