Berbera (SLpost)- Mulkiilaha Gaadhi noociisu yahay kuwa Xammuulka ee loo yqaano Candho-meydlaha oo saddex todbaad ku xanniban ku xanniban Dawga Buurta Sheekh oo uu ka dhacay, ayaa qaylo-dhaan ugu jeediyey xukuumadda shacabka gurmad ka dhan sidii looga saari lahaa, ka dib markii lagu guul-darraystay isku-dayo dhowr ah oo loogu gurmaday.
Baabuurkaasi oo dekadda magaaladda Berbera ka qaaday 550-kiish oo Baasto ah ayaa la sheegay in uu meel badhtamaha buurta dawga Sheekh ah markii uu marayo halkaasi ka dhacay, iyada oo gaadhigaasi uu muddo 23 maalmood ah xaniban yahay isla markaana aanu weli cid gaadhiga meesha ka saarta ka heli dhinaca xukuumadda Somaliland iyo dadka shicibka ahba.
Maxamed Sheekh Ibraahim (Geele), oo ah derawalka iyo Mulkiilaha baabuurkaasi oo maanta u waramay saxaafadda qaarkeed, ayaa sheegay in aanu mudadda intaasi le’eg ee uu halkaasi ku xanibnaa wax caawimo iyo taageero ah ka helin dhinaca dawladda iyo cid kale midna, waxaanu tilmaamay in baastadda uu siday oo ay lahayd shirkadda Al-ikhwa in ay burburtay ka dib markii ay isku deyeen in ay baabuurka ka dejiyaan.
Maxamed Sheekh Ibraahim, oo ku magac dheer Geele oo ugu horayn ka waramay sida ay wax u dhaceen iyo mudadda uu halkaasi baabuurkiisu yaalay, waxa uu yidhi “Magacaygu waa Maxamed Sheekh Ibraahim (Geele), baabuurkaygu wuxuu halkan ku dhacay muddo haatan laga joogo 23-maalmood, waxaan ka imid Berbera waxaanan u socday magaaladda Beledweyne, baaburku wuxuu siday Baasto, waxaana laga soo raray dekadda Berbera, Baastadaasina waxaa leh Shirkadda Al-Ikhwa, baabuurkayga noociisu waa kuwa loo yaqaano Can-dhomeydle. Maalinta uu gaadhigaydu meeshan ku dhacay habeen Salaasa ah ayay ahayd, markii aan buurta Sheekh soo koray waxaan siday 550-kiish oo Baasto ah, meel dhexe marka aan marayo ayaa waxa dhacay gaadhiga ayaa woxoogaa saacadu iga kacday, oo wuu yaro kululaaday, Biriiga ayaan qabtay oo waan is-taagay, markii aan is-taagayna baabuurkii dib ayuu u cararay, oo uu taraaray”.
Isaga oo hadalkiisa sii watayna waxa uu yidhi “Subaxnimadii gurmad ayaa iiga yimid xagga Burco xamaaliin ah, gaadhigii ayaa rarkii maalintii ilaa habeenkii saddex beri ayaa laga rogayay, saddexdaasi maalmood ee laga rogayay iyo xamaaligaasi badan ee uu galay ayaa dhibaato faro badan keentay, oo Baastadii ayaa iga burburtay oo gaadhigii ayaa iga burburay, inta waxaas oo dhibaato ahi igu dhacday, dawladii Somaliland iyo dadkii Soomaalida ahaa ee Islaamka ahaa ee dhulka deganaa wax gar-gaar ah kama aan helin, sidii aan ka filayay ma aha, shan iyo toban sanno ayaan Somaliland gaadhigan kaga shaqaynayay. Ilaa imikana halkii ayaan joogaa cid ii timid iyo wax rejo ah oo aan hayaana ma jirto, xagga dawladda cid kama hayo, qof bani’aadam ah ma hayo, Burco waan tegay, Berbera waan tegay qof iga naxa lama arko”.
Maxamed Sheekh Ibraahim (Geele), oo aanu waydiinay gaadhi Wiish ah oo la sheegay in maalin dhawayd loo soo diray ayaa sheegay in wiishkaasi uu ahaa mid ay lahayd shirkadda korontadda ee Beder, isla markaana uu wiishkaasi baabuurka qaadi kari waayay maadaama oo uu tankiisu ahaa mid aad uga yar baabuurkiisa.
“Gaadhi Wiish ah oo maalin dhawayd ii yimid Shirkadda Beder layidhaa oo Burco iyo Sheekh u shida laydhka nin leh ayaa iska lahaa, oo Burco ayuu iiga yimid, wiishkaasina 140-tan ayuu ahaa, fureyaashiina waa laga xaday derewal fiican oo yaqaanana waa la waayay, wiishkii noo yimidna niman ayaa af-lagaadeeyay, oo yidhi wadaddii ayaad xidhay oo ninkii waday iyo anigaba waa lana laayay, oo ninkii wiishka lahaa habeenimadii ayaa la xidhay, dadka waxaasi nagu sameeyayna magaaladda Sheekh ayay hada joogaan oo waa niman odayaal ah,” ayuu yidhi Maxamed Sheekh Ibraahim (Geele).
Geele, oo hadalkiisa sii watay ayaa yidhi “Waxaa jirta waraaq la gooyo oo $25 dollar ah, oo ay gooyaan is-kaashatadda gaadiidka ee aan ku jiro, is-kaashataddana waxaan ku niqiinay gaadhiga markii ay wax ku dhacaan in lacagtaasi la ururinayo lagu caawiyo, lacagtaasina waa la iga qaadaa, meel walba oo aan joognana taasi ayaanu ku niqiinay, haday Xamar tahay, haday Boosaaso tahay, haday Gaal-kacayo tahay iyo magaallo kastaba, Somaliland na is-kaashato ayaan kaga jiraa oo gaadhigaygu wuu buufisan yahay, lacagtana waa la iga qaadaa, is-kaashadii aan ku jirayna waxba kama hayo oo iima soo gurman, aniga baabuurkayga lanbarkiisa Somaliland waa 31216, sidoo kale waraaqdii cashuurta waddo marista ee Somaliland lixdii bilood ee u dabeeyay waan bixiyay oo baabuurkayga way ku dhejisan tahay iyo cashuurta liisanka dhamaanba waan bixiyay, maalin iguma baaqato”.
Maxamed Sheekh Ibraahim (Geele), ayaa fariin u diray xukuumadda Somaliland, guud ahaanba umadda islaamka ah, waxaanu yidhi, “Fariinta aan umadda Soomaaliyeed u dirayaa waxay tahay bil Ramadaan ayaa igu soo dhaw meeshana iska daa dabaysha iyo kulaylka ka dhacaya, waad yaabaysaa, meel uu qof bani’aadam ahi joogi karo ma aha, qof ay dani hayso mooyaane, umadda Soomaaliyeed, islaamka iyo dawladda Somaliland waxaan ka codsanayaa gaadhigan in ay iiga bixiyaan meeshan.”
SOMALILANDPOST.NET
