Hargeysa (SLpsot)- Guddoomiyaha ahna murashaxa Madaxweynaha ee Xisbiga Kulmiye, Muuse Biixi Cabdi, ayaa magacaabay Guddiga Diyaarinta iyo Maamulka Muraaqibiinta Xisbiga uga qayb-qaadanaya doorashada la filayo inay bisha soo socota ka qabsoonto dalka.
War-saxaafadeed ka soo baxay Xafiiska Warbaahinta Xisbiga oo uu ku saxeexan yahay Guddoomiye Muuse Biixi, ayaa lagu shaaciyey Shan Xubnood oo guddigani ka kooban tahay taas oo uu guddoomiye u yahay Cabdicasiis Maxamed Samaale, wasiirkii hore ee Maaliyadda Somaliland.
War-saxaafadeedka oo nuqul ka mid ahi soo gaadhay Somalilandpost, ayaa u qornaa sidan: “Ujeeddo: Magacaabista Guddida Diyaarinta iyo Maamulka Muraaqibiinta Xisbiga KULMIYE.
Xisbiga KULMIYE isaga oo aqoonsan muhiimadda ay Muraaqibiinta Xisbigu u leeyihiin hufnaanta Doorashada Madaxtooyada ee soo socota, waxa uu magacaabay Guddida Diyaarinta iyo Maamulka Muraaqibiinta Xisbiga KULMIYE. Xubnaha Guddida Diyaarinta iyo Maamulka Muraaqibiinta Xisbiga KULMIYE waxa ay kala yihiin:
1.Cabdicasiis Maxamed Samaale – Guddoomiye
2.Cabdiwaaxid Cabdiqaadir Cabdiraxmaan – Guddoomiye Ku Xigeen
3.Cabdikariim Axmed Maxamed
4.Ibraahim Daahir Dubad
5.Axmed Muumin Seed
Guddidani waxa ay masuul ka yihiin diyaarinta, tababarka iyo maamulka muraaqibiinta iyo goob-joogayaasha Xisbiga KULMIYE. Waxa kale oo ay masuul ka yihiin adeegsiga farsamada cariga ah ee IT-ga iyo xog ururinta (Data Collection). ALLAA MAHAD LEH,
Muuse Biixi Cabdi, Guddoomiyaha Xisbiga KULMIYE.”
