Hargeysa (SLpost)- Aqlabiyadda Xildhibaannada Golaha Wakiillada, ayaa maanta Maxkamadda Sare ee Somaliland u gudbiyey warqad ay ku dalbanayaan inay go’aan ka soo saarto Xeer Lr.14 oo khilaaf laysku af-garan waayey ka dhex-abuuray Golahaas.
Aqlabiyadda Golaha oo ka kooban 46 Xildhibaan oo isugu jira mudaneyaal ka soo baxay Saddexda Xisbi Qaran, ayaa warqad ay ku saxeexan yihiin u gudbiyey Maxkamadda sare oo maanta ka guddoontay, waxaana ku lifaaqan qodobbada khilaafku ka dhashay ee khuseeya xeerka furista ururrada siyaasaddda oo madaxweynuhu dib ugu soo celiyey Golaha Wakiillada.
Xildhibaannada ayaa markii ay ka soo baxeen Maxkamadda Sare waxa ay la hadleen warbaahinta, waxaana mudaneyaasha arrintan ka hadlay ka mid ah Xildhibaan Maxamed Xuseen Maydhane oo sheegay in ay Maxkamadda Sare Xeer 14 oo ka gole ahaan ay isku khilaafeen, wax heshiis ahna ka gaadhi waayeen, waxaanu xusay in dadweynuhu ay sugaan go’aanka Maxkamadda Sare.
“Annagu waxa aanu u dhaaranay in dalka, dadka iyo dastuurka aanu ilaalino, qodobka 38aad ee dastuurkuna waxa uu dhigayaa xildhibaanadu marka ay shaqadooda gudanayaan inay si waafaqsan dastuurka iyo Xeer-hoosaadkooda u gutaan.
Annaga oo ka duulayna taas, halkan oo maxkamaddii ah waxa aanu u nimid inay tafsiir sharci ka bixiso Qodob dastuuriy ah oo aanu isku qabsanay, marka wax la isku qabtana cidda loo gudbinayaa waa Maxkamadda dastuuriga ah,”Sidaas ayuu yidhi Xildhibaanku, waxaanu intaas ku daray, “Waxaanu nahay Gole Dastuurka ku aasaasan, hay’ad sharci ah ayaanu nahay, bulshada waxa aanu u sheegayna in aanu u noqonay halkii lagu kala baxayay oo ah Maxkamadda Dastuuriga ah, dadweynuhuna ha sugaan wixii ka soo baxa ee xaq ah.”
Xildhibaan Maxamed Abiib Yuusuf ayaa isaguna dhankiisa faahfaahin dheeraad ka bixiyey sababta khilaafka Golaha ee ka dhashay Xeer 14 iyo Sababta ay Maxkamadda Sare ee Dastuuriga ah ugu gudiyeen, waxaanu yidhi, “Wax dhibaato ahi kama jirto Golaha wakiillada, balse golahayagu waxa uu isku qabtay laba qodob oo sharci ah, labada qodobna Dastuurka ayay ku xusan yihiin. Waxaanu isku qabanay madaxweynuhu Xeer 14 wakhtigii loogu talay ayuu ku soo gudbiyey iyo kumuu soo gudbin. Qayb ka mid ahi waxa ay leedahay waxa loo raacaya soo celinta madaxweynaha qodobka 77aad ee dastuurka Jamhuuriyadda Somaliland. 46 mudane oo halkan jooga oo guddoomiye ku-xigeenkii golaha wakiilladu ku jiraana waxa ay qabaan qodobka 78aad ee Dastuurka.”
Xildhibaanka sharraxaad ka bixinaya labada qodob ee xildhibaannadu isku hayaan, waxa uu yidhi, “Qodobka 77aad oo ee Dastuurku wuxuu sheegayaa haddii madaxweynuhu 21 cisho gudahooda ku soo celin waayo xeerka, goluhu waajibaadkii ahaa saxeexa iyo faafinta ayuunbuu wareejinayaa, shaqo kale oo golaha wakiillada u dirayaa ma jiro.
Haddii uu madaxweynuhu ku soo celiyo 21 cisho gudahood, qodobka 78aad wuxuu xusayaa in goluhu soo jeedinta madaxweynaha cod u qaadayo, taasi oo dhigaysa in goluhu soo jeedintii madaxweynaha ku raaco ama uu ku diido.”
Xildhibaanka oo hadalkiisa sii watay, waxa uu intaas ku daray, “Madaxweynuhu wuxuu xeerka haystay 53 maalmood, waxaanu madaxweynuhu ku sababeeyay in golayaashu ay maqnaayeen, balse golayaasha Qaranku maqnaanshiyo ma galaan. Xoghayaha ayaa jooga oo qabta marka xeerka la soo celiyo. Sidoo kale guddoomiyihii hore ee Golaha Wakiilada ayaa joogay oo waakii guddoomiyaha Cusub xilka ku wareejiyay,” sidaas ayuu yidhi Xildhibaan Maxamed Abiib oo sheegay inaanu jirin khilaaf siyaasadeed oo ka jira Golaha Wakiillada, balse uu jiro khilaaf sharci oo ka-garnaqiisa ay ka sugayaan Maxkamadda Sare.
Xildhibaannada ku saxeexan waraaqada maanta loo gudbiyey Golaha Wakiillada ayaa magacyadoodu kala yihiin:
- Xildhibaan CaIi Jamac Caraale
- Xildhibaan Axmed Maxamed Maxamuud
- Xildhibaan Maxamed Xuseen Jaamac (Rambo)
- Xildhibaan Fu’aad Maxamed Diiriye
- Xildhibaan Mubaarik Xuseen Maxamed
- Xildhibaan Abdikarin Mohamed Muhumed
- Xildhibaan Ahmed Hassan Call Casoowe
- Xildhibaan Suleiman Mohamed Farah
- Xildhibaan Ahmed Abdi Duale
- Xildhibaan Abubakar Siciid Cali
- Xildhibaan Abdilahi Muse Abdi
- Xildhibaan Saleiman Carab
- Xildhibaan Mohamed Osman Mohamed
- Xildhibaan Cabdinaasir Yusuf Qodax
- Xildhibaan Aadan Cismaan Xarbi
- Xildhibaan Sheekh Axmed Dayid Aadan (Ku-caddeeye)
- Xildhibaan Cali Hussien Nuur
- Xildhibaan Cabdirashiid Cabdilaahi muuse
- Xildhibaan Mustafe Ahmed Abdilahi
- Xildhibaan Yaxye Abdilahi Amiin
- Xildhibaan Jamal Aden Diiriye
- Xildhibaan Ibrahim Mohamed Jama
- Xildhibaan Saalax Mohamed Diiriye
- Xildhibaan Yaasin X Mohamoud Xiir Faratoon
- Xildhibaan Ibrahlm Aw Jama Suudi
- Xildhibaan Mukhtaar Ibrahim Hashi Cilmi
- Xildhibaan Nuuradlin Ahmed Dayib Abdirahman
- Xildhibaan Xirsi Abdilahi Xirsi
- Xildhibaan Jama Abokor Mohamed
- Xildhibaan Ahmed Abdi Muse
- Xildhibaan Hassan Saleeban Dhuxul
- Xildhibaan Ahmed Mohamoud Abdllahi
- Xildhibaan Mohamoud Saalah Abdi
- Xildhibaan Mohamud Xayir Duale
- Xildhibaan Jama Axmed Oogle
- Xildhibaan Abokor Farah Warsame
- Xildhibaan Mohamed Abiib Yusuf
- Xildhibaan Mohamed Hassan Said
- Xildhibaan Mohamed Jama liban
- Xildhibaan JimcaaIe Ahmed Elmi
- Xildhibaan Bashiir Hussein Xirsi
- Xildhibaan Gulled Mohamed Warsame
- Xildhibaan Abdifataax Sh Mohamed Ahmed
- Xildhibaan Maxamed Xuseen Maydhane
- Xildhibaan Cabdikariin Meecaad Xuseen
- Xildhibaan Amiin Saleebaan Jaamac
Xildhibaannada Xisbiyada Mucaaradka ee taageersan furista ururrada siyaasadda ayaa badankoodu ka soo jeedaan Gobollada Awdal iyo Sool oo rabitaankoodu in furista ururrada siyaasadda qayb ka noqdaan ururro siyaasadeed oo metala beelaha darafyada maadaama hoggaanka saddexda xisbi Qaran u af-duuban yahay Beesha Dhexe.
Somalilandpost.net
contact@somalilandpost.net