Burco, (SLpost)- masuuliyiinta sar sare xisbiga mucaaridka ah ee Udub ee gobolka Togdheer ayaa taageeray go’aankii hore ee xisbigoodu iyo xisbiga kale ee Ucid ku diideen doorashooyinka soo socda in lagu galo diiwaangalintii hore isla markaana waxay sheegeen habayaraatee in aaney aqbali-doonin.
Masuuliyiintan Udub oo shir jaraa’id ku qabtay Huteelka Shamaxle ee maagalada Burco ayaa sidoo kale faashil ku tilmaamay siyaasada Xukuumadda Siilaanyo ee arimaha debeda iyo ta gudaha ee ay dalka ku maamusho .
“Xukuumadda maanta xilka haysa ee Siilaanyo iyo Komishankuba waxay doonayaan diiwaangalintii hore ee khal-khashay in doorashooyinka soo socda lagu galo markaas iyddoo axsaabta mucaaridku arintaas hore u qaadacday ama u diiday anaguna maanta waxaanu halkan ka cadaynaynaa in aanu aqbali-doonin diiwaangalintaa hore in doorashooyinka lagu galo hadaanu nahay Udub ,waayo iyaddoo aynu ka warhayno diiwaangalintaasi dalka dhibta ay u gaysatay iyo khaladaadka ka dhacay doorashadii hore , hadana maanta cida doonaysa in doorasho danbe lagu galo diiwaangalintaasi, anagu waxaanu u aragnaa in ay dalka qalalaase galinayaan oo ay leeyihiin halays dilo “ Sidaasi waxa yidhi Guddoomiyaha Xisbiga Udub ee Gobolka Togdheer Ayaanle Cismaan Ibraahim.
Geesta kale mar’uu Guddoomiyaha Udub ka hadlaayay siyaasad xumo uu sheegay in ay Xukuumadani dalka galisay waxa hadaladiisii ka mid ahaa “ Udub iyo Snm-toona wixii ay dalka u qabteen lama sheegikaro ,waayo wax lagu miisaamaba lama hayo ,halkii ay Udub dalka gaadhsiisayna Xukuumadda maanta jirtaa 35% ayay hoos uga riday meelaha ay ku fashilantayna waxa ka mid ah siyaasada arimaha debeda ,ta waxbarashada iyo xuduudaha dalka iyaddoo intaasiba jirta hadana waxaad arkaysaa rag ka mid ah Xukuumadan oo waxaan jirin oo been ah dadka u sheegaaya waxaan leeyahay hadii arimahaas laga xishoon waayo waxa jira ayaa la sheegi-doonaa ee ogaada “ Sidaasi ayuu hadalkiisa ku soo xidhay Ayaanle .
Siciid Cilmi Axmed Xoghayaha Udub ee gobolka Togdheer oo isna halkaasi ka hadlay ayaa yidhi “ Waxaanu taageeraynaa go’aankii hore ee madaxdayada Udub iyo Ucid-ba ku diideen diiwaangalitii hore in lagu galo Sedexda doorasho ee danbe ,doorashadii hore ee diiwaangalintaasi lagu galay xal ayay ahayd waayo doorasho raagtay ayaynu isdhaafinaynay ,markaa waxaanu leenahay diiwaangalin kale hala sameeyo ama halaga guuro “ Sidaasi ayuu hadlkiisa ku soo xidhay Mr. Siciid.
Aadan Cawad Seed Madaxa wacyigalinta xisbiga Udub ee gobolka Togdheer oo isna shirkaasi ka hadlay ayaa qaadacay diiwaangalintaasi hore waxaanu Komishanka usoo jeediyay in ay sameeyaan diiwaangalin cadaalad ku dhisan oo doorashooyinka lagu qabto ,taasi oo aan dalka u horseedin khalkhal iyo fawdo .
Sidoo kale waxa iyna halkaasi ka hadlay Cali Aw-Cigaal ,Cabdi Caateeye Aar iyo Marwo Aamina Buraale oo ka mid ahaa masuuliyiinta Udub ee gobolka Togdheer.
Somalilandpost.net
yaasiin_29@rocketmail.com
