Muqdisho (SLpost)- Allaha u naxariistee waxa maanta gelinkii hore magaalada Muqdisho Aas Qaran loogu sameeyey Marxuum Maxamed Suleyman Tubeec oo Meydkiisa saaka laga soo dejiyey garoonka diyaarada ha ee Aadan Cadde.
Maxamed Saleebaan Tubeec oo ka mid ahaa Fannaaniinta Soomaaliyeed ee Qarnigii tagay taariikhda Dahabka ah ka galay suugaanta Soomaalida, ayaa todobaadkii hore ku geeriyooday cusbitaal ku yaala dalka Jarmalka oo uu xaalad caafimaad u yaallay muddo bilo ah.
Aaska Qaran ee loo sameeyey Marxuum Maxamed Saleebaan, waxa ka qayb-galay Raysalwasaraaha Soomaalida Dr. Cabdiweli Sheekh Axmed Maxamed, Wasiirro xukuumadda ka tirsan, Xildhibaanno, Fanaaniin iyo dadweyne aad u farabadan iyo xubno ka mid ah ehelada marxuumka.
Allaha u naxariistee meydka marxuumka ayaa lagu aasay qubuuraha Iskuul Boliisiya, kadib markii laga soo gelbiyay garoonka diyaaradaha iyadoo salaadda Janaasada lagula tukaday isla goobta lagu aasay.
Dhinaca kale, Xukuumadda Somaliland oo todobaadkan shaacisay inay Aas Qaran magaalada Berbera ugu samaynayso Marxuum Maxamed Saleebaan oo ku dhalashay deegaanka Laaleys ee gobolka Saaxil, ayaa ku fashilantay inay fuliso ballan-qaadkaas, ka dib markii ay ku guul-darraystay inay ka hawl-gasho soo qaadista Meydka marxuumka oo Qaraabadiisu ka codsatay xukuumadda in loo soo qaado dhinaca Somaliland, ka dib markii la sheegay inuu Marxuumku ku dar-daarmay in lagu aaso magaalada Berbera ee Xarunta gobolka Saaxil.
Arrinta ku saabsan Aaska Marxuum Maxamed Saleebaan iyo sidii Meydkiisa looga soo qaadi lahaa dalka Jarmalka, ayaa loolan siyaasadeed ka dhex-abuurtay xukuumadaha Somaliland iyo Somaliya, waxaana ugu dambayntii soo if-baxday inay xukuumadda Muqdisho ku guulaysatay inay Meydka Marxuumka ka dejiso magaalada Muqdisho oo ay hore u ballan-qaadeen in Aas Qaran loogu samayn doono, halka xukuumadda Somaliland ay u ballan-qaadday ehellada Marxuumka ee ku sugan magaalada Hargeysa inay ka taageerayso sidii Meydkiisa loo keeni lahaa magaalada Muqdisho.
SOMALILANDPOST.NET