(Maalin-qorka “Mucjisadii nagu soo martay Wasaaradda Warfaafinta: 19/3/12ka-4/9/12ka) Qalinkii Maxamed Cismaan Mire (Sayid) Guddoomiyaha Dawan Media Group.
E-mail: dawanchairman@gmail.com
Qormadii 15aad ee qoraaladan taxanaha ah, waxaan idiinku soo sheegay in wasiir Boobe markii uu ka dhicisoobay qorshihii musuq maasuqa ku dhisnaa, ee uu madaxtooyada lacagta kaga doonayey. In uu bilaabay sidii uu u fashilin lahaa xukuumadii uu ka tirsanaa. Waxa kale oo aan idiin soo sheegay inuu si ka baxsan milgaha madaxnimo, oo aad u fool xun dagaal ugu qaaday qaar ka mid ah Agaasimeyaashii iyo hawlwadeenadii kal duwanaa ee ka shaqaynayey wasaaraddii uu xukumayey. Isla mar ahaantaana waxa uu isku diray, oo uu si toos ah isaga hor keenay madaxdii iyo shaqaalihii wasaaradda oo dhan. Kuwaasoo uu ka dhigay qaar isaga ku xidhan oo wax u soo basaasa iyo qaar uu iska fogeeyey oo loo soo basaaso.
Hadaba arimahaas oo dhami waxa ay wasaaraddii ka dhigeen, mid fadhiid ah oo aanay wax shaqo ahi ka soconin. Shaqaalihii iyo masuuliyiintii wasaaradda ee mid kasta Boobe hortii lagu qiimayn jirey, laguna tixgelin jirey wax qabadkiisa, hawlkarnimadiisa, daacadnimadiisa, aqoontiisa, shaqo wanaagiisa iyo xilkasnimadiisana, waxaa dhacday in waxa qudha ee lagu qiimeeyo, laguna qadariyaa uu noqday, kolba sida uu wasiirka ugu soo basaaso madaxda iyo shaqaalaha kale ee wasaaradda, gaar ahaan kuwa uu wasiirku neceb yahay. Waxa kale oo dhacday in waxa ugu weyn ee shaqaalaha lagu dalacsiiyo, laguna abaal mariyaa noqotay, kolba sida ay wasiirka agtiisa ugu kala xan iyo warsheeko badan yihiin.
Jiritaanka arrimahaasna waxa cadayn ugu filan, oo aad ku xaqiiqsan kartaan sheekada hoos ku xusan. sheekadaas oo aan hubo in akhriskeedu idiin sahli doono sidii aad xog ogaal ugu noqon lahaydeen, waxyaabihii uu ka dhashay khilaafkii dhex maray Wasiir Boobe iyo dhawrka Agaasime ee uu had iyo jeer qoraaladiisa ku caayo. Waxa kale oo aad sheekadan akhriskeeda si fiican uga daalacan doontaan habdhaqankii diinta islaamka iyo dadnimadaba ku xumaa ee aanu kala kulanay wasiir Boobe. Sidaas si la mid ahna sheekadani waxa ay idinbaridoontaa nooca ay ahayd shakhsiyada runta ah ee uu lahaa ninka wasiirka noo ahaan jirey. Sidoo kalena waxa xaqiiqo ah in sheekadan akhriskeedu uu idiin fududayn doono sidii aad runta iyo beenta ugu garnaqi lahaydeen, una kala reebi lahaydeen.
Hase ahaatee inta aanan sheekada u gelin, waxaan jecelahay in aan dib idiin xusuusiyo sheeko uu Boobe qoraaladiisa hore ugu sheegay. Taasoo iyaba waa cajebe! Uu Boobe ku sheegay in madaxtooyadu ay Telefoonka cod kaga duubtay! . Horaase loo yidhi “Nin waliba sida uu yahay ayuu dadka oo dhan wada moodaaye” . Aynu u gudubno sheekadiiye bal hada si fiican idinku u dhuuxa, oo uga bogta. Ka dibna isu eega oo is bar bar dhiga, sheekadan iyo sheekada Boobe ee aan idin xusuusiyey.
Waxay ahayd habeen ka mid ah habeenadii bishii Ramadaan ee ina dhaaftay. Waa habeen khamiis ah oo ay taariikhdu ahayd 02. 08. 2012. Si kale hadaan idiinku sheego waxuu ahaa, maalintii uu Hantidhawrka baadhista ka bilaabay wasaaradda warfaafinta oo ku beegnayd 01. 08. 2012. maalintii ka dambaysay habeenimadeedii. Habeenkaas waxa dhacday in anaga oo ka kooban lix ka mid ah Agaasimeyaasha iyo masuuliyiinta wasaaradda warfaafinta aanu fadhiisanay qol ku dhex yaala xarunta Wargeyska Dawan, oo aanu had iyo jeer si caadi ah u fadhiisan jirney. Fadhigayagii habeenkaasinakamaduwanayn fadhiyadaas caadiga ah ee aanu halkaas fadhiisan jirney. Ma ahayn fadhi qarsoodi ah, oo aanu isugu nimid anaga oo cid ka dhuumanayna. Ma ahayn fadhi aanu ku shiraynay, oo aanu ajende gaar ah iyo arimo khaas ah kaga wada hadlaynay. Ma ahayn fadhi aanu cid ugu tashanaynay, ama cid wax ku yeelaynay, cidna wax ugu taraynay. Sidoo kale ma ahayn fadhi aanu ku ballansanayn oo hore noogu sii qorshaysnaa. Balse waxa uu ahaa fadhi aanu dar Illaahay iyo si caadi ah oo aan ku talo-gal ahayn isugu nimid.
Dabcan marka dad isku shaqo ahi meel ku kulmaan, waa wax caadi ah, oo dhici kara in ay ka sheekaystaan, kana wada hadlaan. Waxyaabo shaqadooda iyo mihnadooda ku saabsan. Sidaas darteed kulankayagaas waxaanu ka sheekaysanay waxyaabo shaqadayada khuseeya. Kuwaas oo ay ugu weynayd baadhistii Hantidhawrku ka bilaabay wasaaradayada. Qof waliba waxuu ka waramay sida uu shakhsiyan u arkayey baadhista hantidhawrku nagu bilaabay. Taas oo uu nin waliba uga hadlay sidii ay isaga la ahayd. Waxa kale oo aanu ka hadalnay sidii uu mid kasta oo ka tirsan masuuliyiinta wasaaraddayada dareenkiisu noqday, subaxdii hanti dhawrku na soo galay. Isku soo wada duuboo sheekadayada oo dhami habeenkaas waxay u badnayd baadhista hantidhawrka iyo qof waliba dareenkii uu ka bixiyey. Maxaa dhacay hadaba? Waxa dhacay run ahaantii wax yaab leh, oo aan koleyba aniga hore ii soo marin!!. Bal hada maleeyo waxaasi waxa uu ahaa. Waa hubaal in aanu ahayn wax aad malayn karaysaane aan idiin sheego.
Waxaa dhacday in uu nin ka mid ah lixdii nin ee aanu halkaas ku fadhinay, si qarsoodi ah nooga duubay wax alla wixii aanu habeenkaas ku sheekaysanaynay oo dhan!!. Ka dibna wixii uu hadal iyo sheeko naga duubay oo dhan waxa uu isla subaxnimadiiba farta ka saaray wasiir Boobe. Waxaan maqli jirey “Biddo intaadan Biddo ku odhan ayay iyadu Biddo ku tidhaahdaa”
La soco……………………….
