Hargeysa, 10 January, 2012 (SLpost)- Madaxweynaha Jamhuuriyadda Somaliland Md. Axmed Maxamed Maxamuud (Siilaanyo) ayaa maanta xilalkii Guddoomiye-nimo ka qaaday Saddex ka mid ah badhasaabbada gobollada dalka iyo Badhasaab ku-xigeen isla markaana qaar u cusub u magacaabay.
Masuuliyiintan gobollada ee uu madaxweynuhu xilka ka qaaday oo hayey maamullada gobollada ugu miisaanka culus Somaliland ayaa kala ah Guddoomiyihii Gobolka Togdheer Yaasiin Muxumed Cabdi, Guddoomiyihii Gobolka Sanaag Cali Cabdi Hurre, Guddoomiyihii Gobolka Gabiley Cali Aaden Meecaad iyo Guddoomiye-xigeenka gobolka Togdheer Cabdi Daahir Xasan, waxaanu isla markaa ku beddelay masuliyiin cusub oo la faray inay si dhakhso leh xilka ula wareegaan.
Warsaxaafadeed ka soo baxay xafiiska afhayeenka madaxtooyada isla markaana lagu shaaciyey go’aanka xil-ka-qaadista masuuliyiinta gobollada ayaa u dhignaa sidan:
Madaxweynaha JSL, Mudane: Axmed Maxamed Maxamuud (Siilaanyo) waxa uu Digreetooyin Madaxweyne xilalkii ay qaranka u hayeen kaga qaaday Badhasaabadii Gobolada Sanaag, Togdheer, Gabiley iyo badhasaabku xigeenkii Gobolka Togdheer
Sidoo kalena Madaxweynuhu waxa uu u magacaabay Masuuliyiin Cusub oo buuxinaya jagooyinka ay baneeyeen masuuliyiintaa hore.
Madaxweynaha Jamhuuriyadda Somaliland
Markuu Arkay: Qodobka 90aad ee Dastuurka Jamhuuriyadda Somaliland;
Markuu Arkay: Qodobka 110aad ee Dastuurka Jamhuuriyadda Somaliland;
Markuu Tixgeliyay: Ahmiyadda ay Gudoomiyayaasha Gobolladu u leeyihiin dhismaha Qaranka;
Markuu Aqoonsaday: In baahi loo qabo buuxinta jagooyinka Gudoomiyeyaasha Gobolada Gabiley, Sanaag iyo Togdheer;
Markuu La Tashaday: Madaxda ay arrintani khusayso;
Markuu ku Qancay: Inay buuxin karaan, aqoon iyo kartina u leeyihiin jagoouinkan;
Wuxuu go’aansaday
1. In Mudane, Xuseen Cumar Magan, laga bilaabo taariikhda maanta uu ahaado Gudoomiyaha Gobolka Gabiley ee JSL.
2. In Mudane, Aaden Diiriye Cigaal, laga bilaabo taariikhda maanta uu ahaado Gudoomiyaha Gobolka Sanaag ee JSL.
3. In Mudane, Cabdoo Axmed Aayer, laga bilaabo taariikhda maanta uu ahaado Gudoomiyaha Gobolka Togdheer ee JSL.
4. In Mudane, Maxamed Maxamuud Yuusuf, laga bilaabo taariikhda maanta uu ahaado Gudoomiye Ku-xigeenka Gobolka Togdheer ee JSL.
Masuuliyiinta Xilalka laga qaaday:-
1. Mudane, Cali Aaden Meecaad – Gudoomiyihii Hore ee Gobolka Gabiley
2. Mudane, Cali Cabdi Hurre – Gudoomiyihii Hore ee Gobolka Sanaag
3. Mudane, Yaasiin Muxumed Cabdi – Gudoomiyihii Hore ee Gobolka Togdheer
4. Mudane, Cabdi Daahir Xasan – Gudoomiye Ku-xigeenkii Hore ee Gobolka Togdheer
Madaxwynaha Jamhuuriyada Somaliland, waxa uu Badhasaabadii hore uga mahad celiyey mududii ay xilalkaas u soo hayeen qaranka, Isla markaana Madaxweynuhu waxa uu digreetooyinkan ku amray inay masuuliyiintani xilalkaa ku wareejiyaan sida ugu dhakhsaha badan gudoomiyeyaasha cusub ee loo igmaday xilalkan inay qaranka halkaa uga siiiwadaan.
Guddoomiye-yaasha gobollada ee xilka laga qaaday ayuu dhammaantood madaxweyne Siilaanyo Xilka u magacaabay marka laga reebo guddoomiyaha gobolka Sanaag oo isagu ka mid ahaa masuuliyiintii ka hadhsanayd maamulkii Daahir Rayaale ee xukunka lagaga guulaystay
