Gabiley, 11 January, 2012 (SLpost)- Iskuduwaha Wasaarada Dib u Dejinta Somaliland ee Gobolada Awdal iyo Salal C/qaadir Muuse Warsame (Aw Farxaan) oo ku sugnaa magaalada Gabiley ayaa maanta warbaahinta ka hawl gasha gobolka Gabiley ku siiyay warbixin dheer oo uu kasoo ururiyay dadka Abaaraha ka barakacay ee gobolada Awdal iyo Salal.
Iskuduwaha ayaa warbaahinta u sheegay inuu kormeer kusoo maray tuulooyinka hoos yimaada gobolada Awdal iyo Salal sida Cali Xaydh, Garba Dadar, Tuurka, Gargaara Bari, Lughaya, Saylac, Lawya Caddo, Caasha Caddo, Ceel Gaal, Gaarisa, Fardaha, Fadhi-xun, Weerar, Dhagax Madaw, Xaliimaale, Boon, Gargooray, Dacar-budhuq, Ceel Baxay, Xariirad, Quljeed, Boorama iyo Dila.
C/qaadir Muuse ayaa sheegay tuulooyinka iyo magaalooyinka uu kor kusoo xusay inuu kusoo arkay xaalad aad iyo aad u ba,an una baahan in si deg deg ah wax looga qabto guud ahaan gaar ahaan magaalada Gargaara oo uu tilmaamay inuu kusoo arkay xaalad ay dadku ay gaajo u dhimanayaan, isagoo isku duwuhu arintaasi ka hadlayana waxaa uu yidhi “Waxaan kusoo aragnay tuulooyinkaasi aan soo sheegay, oo aan kusoo aragnay xaalad aad iyo aad u ba’an, una baahan in si degdeg ah wax looga qabto, gaar ahaan magaalada Gargaara oo aanu ku aragnay xaalad ay dadku gaajo u dhimanayaan. Waxay noo sheegeen todobaad kasta inay u dhintaan hal ilaa iyo laba caruur ah, kuwaasi oo u dhinta gaajo iyo nafaqo darro. Boqolkiiba afartan dadka barakacayaasha ah ee magaalada Gargaara waxay qarka u saaran yihiin inay u dhintaan gaajo haddaanay helin gargaar bani’aadanimo oo la gaadhsiiyo bishan aynu ku jirno ee sanadkan 2012-ka.”
Iskuduwuhu waxaa kale oo uu ka dayriyay xaalada biyaha ee magaalada Gargaara isagoo sheegay inay ka jirto biyo yaraan halis galisay noloshii dadka magaaladaasi, waxaana hadaladiisii ka mid ahaa “Waxaa kale oo ka jirtay biyo la’aan xoog leh iyadoo dadku ay ka dhaansadaan Ceel kaliya oo afbanaan oo markii hore loogu talo galay 150- qoys oo magaalada ku noolaa. Imikana waxaa kusoo barakacay in ka badan 1000 (kun) qoys waxaanay sababtay inay biyo waayaan dadkii magaalada hore usii daganaa iyo barakacayaashiiba.
Iskusoo wada duuboo Iskuduwaha Wasaarada Dib u Dajinta Gobolada Awdal iyo Salal C/qaadir Muuse Warsame(Farxaan) Waxaa uu halkaasi baaq uga diray Xukuumada, Ha,yadaha Caalamiga, iyo Cidkasta oo bani’aadanimada ka hawl gasha inay dadkaasi abaaruhu saameynta adag ku yeesheen Xeebta Galbeed Gobolada Awdal iyo Salal ku sugan yihiin xaalad u baahan in si degdeg ah gargaar loo gaadhsiiyo, Waxaanu Tilmaamay inay u baahan yihiin Raashin, iyo Guryaha kumeel gaadhka ah sida Bacaha iyo Bustayaal ay dhaxanta ka huwadaan.
SLpost News Desk
Kaafi20@hotmail.com
