Hargeysa (SLpost)- Golaha Guurtida ee Jamhuuriyada Somaliland fadhigoodii maanta oo uu shir gudoominaayay Gudoomiyaha Golahaasi Md Saleebaan Maxamud Aadan ayaa Mudanayaashu Warbixin ku saabsan waddooyinka Somaliland ee sagaalkii Bilood ee u Dambeeyey iyo Xaaladda maxaabiista Dalka ka Dhegeysteen Gudoomiyaha Gudida Arimaha Bulshada ee Golaha Guuritida Xildhibaan Cabdiqaadir Maxamed Xasan (Indho-Idho).
Xildhibaanka ayaa Warbixintiisa Ku xusay inay guddi ahaan la Kulmeen Labada Taliye Ciidan ee Asluubta iyo Bilayska iyo Wasiirada Wasaaradaha Caafimaadka iyo Waxbarashada, waxaana uu warbixintaas ku Tilmaamay Dhimashada iyo Dhaawacyada Shilalka Gaadiidka iyo Maxaabiista Xidhan Sagaalkii Bilood ee u Dambeeyay oo Tiradoodu Dhan tahay 1,193 (Kun iyo Shan Boqol iyo Sagaashan iyo Saddex).
Warbixinta Guddoomiyaha Gudida arrimaha Bulshada ee Golaha Guurtida waxaa qayb ka ahayd in dadka ku dhintay shilalka waddooyinka sagaalkii bilood ee u dambeeyey tiradoodu gaadhayso boqol iyo labaatan qof, halka dadka ku dhaawacmay shilalka noocaas ah ay kor u dhaafayaan 1,160 (kun boqol iyo lixdan), Gaadiidka ku burburayna ay gaadhayaan 1,044 (kun iyo afar iyo afartan) gaadhi mudadaas sagaalka Bilood ah .
Xildhibaan Indho-Indho waxuu sheegay in Khasaaraha xoolaha nool ee ka yimid shilalka waddooyinka Somaliland ay tiradoodu dhantahay 363 (saddex boqol lixdan iyo saddex) neef, tiro badan oo dhismayaal ahna ay ku burbureen ama waxyeello ka soo gaadhay.
SOMALILANDPOST.NET
