“Caliyow wax badan baa laga xishoonayaaye inaad xishooto way wanaagsan tahay, xilligan kala guurka ah hawshaas aad samaysayna waxaan ku odhan lahaa ma wanaagsana ee ka tanaasul”
Hargeysa (SLpost)- Xildbibaano ka tirsan Golaha Deegaanka Hargeysa, ayaa ku gacan-saydhay Qorshe Wasiirka Arrimaha Gudaha Somaliland Md Cali Waran-cadde wax kaga beddelay Nidaamka Waddo-marista qaybo ka mid ah Jidadka Caasimadda, taas oo soo noolaysay khilaaf salka ku haya awood kala-riixasho oo u dhexeeya Wasaaradda Arrimaha Gudaha iyo Dawladaha Hoose ee dalka.
Khilaafkan ayaa soo shaac-baxay kaddib markii Wasiirka Arrimaha Guduhu soo saaray digireeto uu wax kaga beddelay nidaamka waddo-marista qaybo ka mid ah jidadka magaalada Hargeysa, waxaanay tallaabadaasi ka cadhaysiiyey dawladda Hoose ee Hargeysa oo u aragta in wasiirku la wareegay masuuliyaddii ka saarnayd habaynta iyo wax-ka-beddelka qorsheynta caasimadda.
Qorshaha wax lagaga beddelay nidaamka waddo-marista ee caasimadda oo shalay hirgalay, ayaa wax ka beddelay nidaamka waddo-marista ee laba ka mid ah jidadka hal-bowlaha u ah magaalada Hargeysa, kuwaas oo kala ah waddada hor-marta madaxtooyada oo la amray inay gaadiidku u isticmaali karaan oo kaliya Hal Haad oo u socda dhinaca Galbeed iyo waddada Xagga dambe ka marta cusbitaalka Guud ee Hargeysa oo gaadiidku u soconayaan oo kaliya Dhinaca Bari.
Xildhibaanno ka tirsan Golaha deegaanka ee Hargeysa, ayaa ka soo horjeestay tallaabada wasiirka wax-ka-beddelka ku sameeyey jidadka caasimadda isaga oo aan wax talo-wadaag ah kala yeelan Golaha deegaanka Hargeysa, waxaanay ku tilmaameen mid ka hor imanaysa isla markaana xad-gudub ku ah waajibaadka shaqo ee Golaha deegaanka Caasimadda.
Xildhibaan Xasan Cali Cabdi (Xasan Shahar) oo ka tirsna mudaneyaasha golaha Deegaanka Hargeysa, ayaa wasiir Waran-cadde ugu baaqay inuu faraha kala baxo hawsha iyo waajibaadka shaqo ee u ku faro-geliyey Dawladda Hoose ee Hargeysa, isaga oo tallaabadaas ku tilmaamay mid ka hor-imanaysa shuruucda dalka ee kala-xadaynta waajibaadka shaqo ee Dawladaha Hoose iyo Dawladda Dhexe.
Xildhibaanka oo arrintan ka hadlayey waxa uu yidhi, “Masuuliyiintii Booliska ee hawshan ka shaqaynayay dhibaatooyin badan baa soo gaadhay, burbur badan baa Caasimaddii ka dhacay, Dadweynihii way yaaban yihiin, waxay leeyihiin waa maxay waxan la samaynayaa. Maye Golihii deegaanka ee aanu dooranay bay leeyihiin, waar dastuurkii iyo qaranimadii miyaa la nacay? Umaddu wax badan bay is weydiinaysaa.”
“Caliyow wax badan baa laga xishoonayaaye inaad xishooto way wanaagsan tahay, xilligan kala guurka ah hawshaas aad samaysayna waxaan ku odhan lahaa ma wanaagsana ee ka tanaasul, mana soconayso ee waa mid laab-la-kac ah oo aan qorshaheedii iyo Boodhkeedii iyo Wacyi-galinteedii iyo wakhtigeedii midna aan helin,” ayuu yidhi Xildhibaan Xasan Shahar.
Sidoo kale, waxa qorshaha Wasiir Waran-cadde mid shuruucda dalka iyo Qorsheynta caasimadda ka horimanaysa ku tilmaamay Xildhibaan Maxamed Cabdi Yoonis oo si qodobaysan u soo bandhigay shuruucda kala-xadaynaysa waajibaadka shaqo ee Dawladaha Hoose iyo Dawladda Dhexe.
Xildbibaan Maxamed Cabdi Yoon oo qoraal dheer oo ku soo bandhigay shuruucda kala-xadaynta waajibaadka dawladaha hoose iyo dawladda Dhexe, waxa uu wasiirka Arrimaha gudaha ku eedeeyey inuu u badheedhay xad-gudubka hawlaha shaqo ee dawladaha Hoose, waxaanu tallaabadan ku sifeeyey mid meesha lagaga saarayo kabka dhaqaalah ee dawladda Dhexe ku taageerto dawladda hoose ee caasimadda.
Wasiirka Arrimaha Gudaha ayaa hore u soo saaray digreeto uu ku faray dawladaha hoose qorshe kor loogu qaadayo bilicda magaalooyinka waaweyn ee dalka, haseyeeshee ilaa immika ka fulin qorsheyahaasi, iyada oo lagu sababaynayo inaanu wasiirku wax talo-wadaag iyo wada-shaqayn ah kala yeelan dawladaha Hoose ee dalka oo ay ugu horeysay ta Caasimadda Hargeysa.
SOMALILANDPOST.NET
