Hargeys, 06 April, 2012 (SLpost)- Wefti ballaadhan oo ka mida ergada gobolada Sanaag iyo Sool ee uga qayb galaysa shirweynaha urur siyaasadeedka WADANI, ayaa maanta soo gaadhay Magaalada Hargeysa.
Weftigan oo uu hogaaminayo guddoomiyaha ururkaas ee gobolka Sanaag Cabdiraxmaan Xiis Liqe ayaa waxa duleedka Bari ee Magaalada Hargeysa ku soo dhaweeyay masuuliyiinta sare ee ururka WADANI, waxaana loo soo galbiyay xarunta dhexe ururka.
Mr Xiis Liqe oo saxaafada la hadlay, ayaa sheegay in ay Magaalada Hargeysa u yimaadeen sidii ay uga qaybgeli lahayeen shirweynaha golaha dhexe ee urur siyaasadeedka WADANI, kaasoo la qoondeeyay in uu 8 illaa 9 bishan April ka dhaco Magaalada Hargeysa, isaga oo masuuliyiinta soo dhaweeyay uga mahadceliyay sida ay u qaabileen.
“Marka hore waxa aan mahadcelinayaa madaxda ururka ee nagu soo dhaweysay Magaalo madaxda gobolka Maroodi-jeex, aniga oo ah guddoomiyaha ururka WADANI ee gobolka Sanaag, waxa aanu shalay Ceerigaabo ka soo baxnay 10:00 AM, halkan waxa aanu nimi maanta 10:00 AM, waxaan aad uga faraxsanahay soo dhaweynta iyo shirka aanu ka qaybgelayno” ayuu yidhi guddoomiyaha ururka siyaasadeedka WADANI ee gobolka Sanaag.
Waxaa kaloo halkaas ka hadlay cc coo hogaaminayay Ergada ka socatay Gobolka Sool, waxaanu mahad naq u jeediyay xubnaha Ururka Waddani ee halkaas ku soo dhaweeyay “Anagu waxaanu nahay ergada ka socota Gobolka Sool, waxananu aad ugu hanweynaha shirweynaha la qabanaayo ee aanu u nimi.”
Axmed Xuseen Fag-fagaash oo ka mida aas-aasayaashii ururka WADANI, oo isna ka hadlay halkaas, ayaa sheegay in ay soo dhaweynayaan ergada uga timid gobolka Sanaag.
“ Waxa sharaf weyn ii ah in aan halkan ku soo dhaweeyo ,mahadnaqna aan siinayaa ergada Ceerigaabo ee maanta halkan noogu timid, ee gobolka Sanaag shalay ka soo ambabaxday , xalay oo dhana soo socotay, maantana halkan soo gaadhay, ayaanu qalbi furan ku soo dhaweynaa,iyaga oo ka qaygeli doona shirweynahayaga aanu qabanayno bisha 8-deeda iyo 9-keeda” ayuu yidhi Fag-fagaash.
sidoo kale waxaa halkaas ka hadlay Xasan Xuseen Codyare oo ka mid ah madaxda Ururka Wadani “Ergadan ka socota Sanaag iyo Sool waa kuwii ugu horeeyay, waxaana daba socda dhamaan Ergooyinkii ka kala imanayay Gobolada oo soo gaadhaya Caasimada Hargeysa ilaa beri insha ALah, waxanan idin sheegayaa inaad timadeen guryihiinii oo aad nala qayabsan doontaa farxada Ururka Waddani, wanan idin soo dhawaynaynaa.” Sidaas waxaa yidhi MD Codyare.
Waxaa saacadaha soo socda iska soo daba dhacaya Ergooyinka ka kala imanaya Gobolada Somaliland ee u socda Shirweynaha Axada iyo Isniinta totobaadkan soo socda ka dhici doona Magalada Hargaysa, gaar ahaan Hotel Mansoor halkaas oo lagu doorana doono hogaanka Ururka Waddani iyo Golihiisa dhexe.
SLpost News
Hargeysa, Somaliland
