Hargeysa (SLpost)- Madaxweynaha Somaliland Md Axmed Maxamed Maxamuud (Siilaanyo), ayaa markii u horreysay tan iyo wakhtigii uu hoggaaminta xisbiga Kulmiye uga digo-rogtay Kursiga looga arrimo talada dalka, ayaa talooyin dhaxal-gal ah u jeediyey xisbiga uu guddoomiyaha ka ahaa wakhtigii uu mucaaradka ah, kaas oo wakhtigan isu-diyaarinaya qaban-qaabada shirweynaha saddexaad ee Xisbiga.
Madaxweyne Siilaanyo waxa uu hadal waano iyo dar-daaran ah ka jeediyey munaasibad loogu diyaar garoobayay shirweynaha saddexaad ee xisbiga Kulmiye oo maanta lagu qabtay xarunta madaxtooyada.
Munaasibadda lagu qabtay xarunta madaxtooyada waxa ka qeyb galay madaxweyne Ku xigeenka Somaliland Cabdixmaan Cabdilaahi Ismaaciil (Saylici), Guddoomiyaha Kulmiye Muuse Biixi Cabdi iyo ku-xigeenkiisa Koowaad Maxamed Kaahin Cabdi, guddiga qaban-qaabada shirweynaha, Gudida fulinta ee xisbiga iyo xubno kale oo ka tirsan Golaha Wasiirrada Somaliland.
