Horumarka iyo Deganaanshiyaha Dalkeena waxaa fure u ah in lagu kala dambeeyo oo la isku ixtiraamo Masuuliyadaha kala duwan ee ay u igman yihiin Madaxda Qaranku. Si horumar usii jirana waa in xaalad kasta oo dalka dibed kaga timaadana si wadajir ah looga wada hortagaa ama looga jawaabaa .
Sidaynu lawada socono, Qarankeena wakhtigan xaadirka ah waxaa lasoo darsay marxalado kala duwan oo ay kamid tahay weerarada siyaasadeed ee cadawgu usoo maleegayo oo ay maanta taagan tahay in CADAAN (Ingiriis) IYO MADAWBA( Walawayn) isku keen soo bahaysteen sidii loo curyaamin lahaa qaranimadeena, wadajirkeena , dawladnimadeena iyo horumarka iyo amniga aynu kusoo tacabnay 21 sanno.
Sidaa darted, waxaan maanta BAAQ udirayaa guud ahaan MADAX IYO MIJO in si wadajir ah loogu diyaar garoobo hujuumadaa bilawga ah ee cadawgu inagu soo qaaday. waa in masuuliyiinta Hayadaha kala duwan sida Golayaasha XEER-DAJINTA , AXSAABTA MUCAARIDKA, XUKUUMADDA talada qaranka u igman loo wada midoobaa . Waa in AFKA IYO ADINKABA la mideeyaa si aynu iskaga caabino duulaamada cadawga.
Talo; Hadalada qaarkamid ah masuuliyiinta xeerdajinta iyo axsaabta qaranka kasoo burqanayaa waxay HIIL u yihiin Cadawga, waxayna dhaawac u gaysanayaan Qaranimadda, ee waxaan leeyahay halaga digtoonaado.
Gabagabdii; dhuuxa tuducyadan:
- Dawladnimo Waa Kala Dambayn iyo Duulaanka Cadawga oo lawada Difaacaaye.
- Dadwaynoow dabciga suuban baa lagu dawoobaaye
- Mar haddaan duligii siyaad jirin oo duudka naga saran
- Dulmigii Afweynana uu daa,im naga qaaday Oo aan dawlad iyo maamul nahay shacabku soo doortay
- Dawladnimadu waa daha guud oon la daayicine oo shacbi iyo dawlad la iskuwada duubmo
- Dawlad nimadu waa madaxda oo laga dambeeyaaye
- Dawlad nimadu waa dunida ood nabad ku daaqdaaye
- Dawlad nimadu waa shay khalqiga daa,im uu faraye
- Dawlad nimadu waa qaranka oon wada daryeelnaaye
* Dawlad nimadu waa dano wadaag daacad loo yahaye, hadaynaan dig toonaan dhamaan waynu dumaynaaye
Wabillahi tawfiiq
Cabdirasaaq Askar
Hargeysa,Somaliland
