Hargeysa (SLpost)- Dawladaha Somaliland iyo Itoobiya ayaa ka wada hadlay sidii Ardayda Somaliland ee wax ka barata dalkaasi looga ilaalin lahaa olole dalka Itoobiya ku dabagalayo ajaaniibta Dalkaasi ku sugan oo ay ka mid yihiin Dalalka jaarka ahi.
Tan iyo intii Dawladda Itoobiya qab qabatay kooxo doonayey in ay qaraxyo ka fuliyaaan caasimadda Addis Ababa waxa soo baxaya walaac soo food saaray dadka Somalida ah maadaama dadka la qab qabtay ay ka mid yihii Somali, kadib markii sida hay’addaha Amaanku sheegeen Dawladda Itoobiya go’aansatay in ay dabagal ku samayso Ajaaniibta Dalkeeda ku sugan.
Arrintan ayaa walaac ku abuurtay Ardayda Reer Somaliland ee dalkaasi ku sugan oo marka ay dalkaasi waxbarasho u tagayaan u qaata Visa kooban balse aan qaadan Visa deganaansho ah waxaana masuuliyiinta Xafiiska Somaliland ku leedahay Addis Ababa ku eedeeyeen inay ka gaabiyeen shaqadooda ahayd in ay u dalbadaan balse iska daa in ay u dalbadadaane ay is dul tuulmeen miiskooda codsiyadii Ardaydu.
Wasiir ku-xigeenka Wasaaradda Arrimaha Dibeda Somaliland Mawliid Maxamuud Ibraahim oo aanu caawa khadka Telefoonka kula xidhiidhnay si aanu cabashada Ardayda iyo Waalidiinta wax uga weydiino isla markaana aanu war faahfaahsan uga helo talaabooyinka ay Itoobiya qaadayso waxa xukuumad ahaan uga qorshaysan si Ardayda Reer Somaliland uga badbaado ayaa sheegay in maanta Labada Dawladood kulamo ka yeesheen arrintan isla markaana guddi wadajir ah oo labada dal ah loo saaray tirakoobka Ardayda Reer Somaliland ee wax ka barata Dalkaasi.
Wasiir Mawliid waxa uu sheegay xafiiska Somaliland ee Addis ababa in uu maanta kulamo la yeeshay Wasaaradda Arrimaha Dibeda Dalka Itoobiya, taasoo balanqaaday in ay Ardayda Reer Somaliland u samayn doonto qaab iyo sharciyad ay waxbarashadooda ku sii wataan isla markaana lagula socon karo dhaqdhaqaaqooda, iyadoo la tixgelin doono inta hawshaas looga dhamaynayo kaadhadhkooda Jaamacadaha.
Dhinaca kale, waxa isa soo taraya Cabasho ay Ardayda Reer Somaliland ee waxbarashada dalkaasi u doontay ay kala kulmeen in ay helaan ogolaanshaha Jamaacdaha Dalkaasi iyagoo sabab uga dhigay Visa la’aanta ay dalkaasi ku joogaan, waxaanay wasaaradddaha Arrimaha Dibeda iyo waxbarshada Somaliland ku eedeeyeen in aanay u suurtogelin fursad ay Dawladda Itoobiya kaga codsadaan in Visa ayaal la siiyo.
