Hargeysa (Somaliland.Org)-Madaxweynaha Jamhuuriyadda Somaliland Md. Axmed Maxamed Maxamuud (Siilaanyo) oo ku guda jira maalintii labaad ee socdaal uu ku tagay Gobolka Gabilay, ayaa maanta gaadhay degmada Allaybaday ee Gobolkaasi,Ka dib markii uu Xarunta Gobolkaas ka furay Mashaariic horumarineed oo laga hirgeliyey, Kuwa kalena dhagax-dhigay.
Madaxweynuhu waxa uu xadhiga ka jaray laba waddo oo dawladda Hoose ee Gabilay ka hir-gelisay magaaladaas,isaga oo geesta kalena dhagax-dhigay xarun ballaadhan oo dawladda Hoose ku shaqayn doonto oo laga hir-gelinayo magaalada Gabilay.
Waxa kale oo Magaalada Gabilay Madaxweynuhu xadhiga ka jaray isticmaalka Gaadiid cusub oo ay soo iibsatay dawladda Hoose ee magaalada Gabilay, kuwaas oo isugu jira Cagaf-cagafyo iyo Dab-damisyo.
Madaxweynaha iyo wefdigiisa waxa si weyn loogu soo dhoweeyey Degmada Alay-baday iyo degaamada hoos yimaada,halkaas oo ay ku qaabileen madaxda, wax-garadka iyo dadweyne tiro badan.
Madaxweynuhu waxa uu dhagax dhigay wado isku xidhaysa Allay-baday iyo Hargeysa waxaanu Warbixin ka dhegaystay Maamulka iyo Waxgaradka degmadaas oo ka dalbaday in Madaxweynuhu inuu gacan ka siiyo horumarinta degmadaas.
Madaxweyne Axmed Maxamed Maxamud Siilaanyo ayaa dhankiisa ka sheegay in Xukuumadiisu aanay waxba kala hagran doonin intii awoodeeda ah wax ka qabashada baahiyaha aasaasiga ah ee degmadaasi u jeelan tahay.
Madaxweynaha Somaliland waxa uu dadweynaha degmadda Allaybaday uga mahad celiyay sidii xamaasadda iyo waddaniyada lahayd ee ay u soo dhaweeyeen weftigiisa, waxaanu yidhi “Waxaan halkan aad iyo aad uga mahad celinayaa aniga iyo weftigayguba sida balaadhan ee aad noo soo dhawayseen ee sharafta iyo qiimaha leh, soo dhawayntana waa mid caado dhaqan idiin ah oo aad waligiinba samayn jirteen.”
Madaxweynaha Somaliland waxa uu sheegay in wixii suurto gal ah ay wax ka qaban doonaan baahiyaha kala duwan ee degmadda Allay-baday iyo guud ahaanba gobolka Gabiley, waxaanu yidhi “Waxaan idinka balan qaadayaa haddii aanu dawladda nahay, waanu dhagaysanay cabashooyinkii halkan (Allay-baday) laga soo jeediyay, waanu ognahay, waanan la soconnaa baahiyaha gobolkan iyo dalkuba qabo. Waxaynu markii hore ahayn dawlad soo koraysa. Waxaanan balan qaadaynaa inaanu wax ka qabano cabashooyinka la soo jeediyay oo mid walba wixii aanu ka qaban karno aanu doorkayaga ka qaadano.:
Dalkeennu waa mid baahidiisu maalin walba kordhayso oo ay meel walba taallo. Dawladeenna waxa soo gala iyo baahida waxqabad ee dalkeenna ka jirtaa ma aha mid wada dabooli karaysa,”ayuu yidhi Madaxweyne Axmed Siilaanyo.
Madaxweyne Axmed Siilaanyo waxa uu shacbiga ugu baaqay inay xukuumadiisa ka gacan siiyaan horumarinta adeegyadda bulshadda ee ay dedaalka gelisay. Waxaanu tilmaamay in iskaashi baaxad leh oo dhex mara shacbiga iyo xukuumadda lagaga midho dhalin karo sidii looga sal gaadhi lahaa horumarka bulshadu ku taamayso.
Weftigu waxaa hadhimo sharafeed loogu sameeyay degmada allay baday waxaanay markaas ka dib waxay Gaadheen Magaalada Wajaale oo si Mug leh loogu soo dhaweeyay.
Sidoo kale, Madaxweynaha Somaliland Mudane Md. Axmed Maxamed Maxamuud (Siilaanyo) waxa uu khudbad u jeediyay kumanaan ka mid ah dadweynaha ku dhaqan degmada Wajaalle ee gobolka Gabiley, kuwaasi oo ku qaabilay qalbi samaan, isla markaana lulayay sawirkiisa, calanka Somaliland,waxaanay ku dhawaaqayeen halku dhigyo ay ugu bandhigayeen iimaanka iyo kalsoonida ay ku qabaan hoggaamintiisa.
Madaxweynaha oo ku mabsuuday soo dhawaynta la yaabka lahayd ee loogu sameeyay Wajaalle ayaa waxa uu yidhi “Waxaan dadweynaha reer Wajaalle aad iyo aad uga mahad celinayaa sida wanaagsan ee aad noo soo dhawayseen iyadoo mar walba sidan oo kale ayaa caadadiina ahayd oo aad ii soo dhawayn jirteen mar walba. Waxaan halkan mar kasta kala tagaa farxad iyo shucuur wanaagsan. Waxaan idiin balan qaadaynaa inaanu wixii aanu ka qaban karno ka qabano horumarinta adeegyadda bulshadda ee kala ah wadooyinka, garoomadda, biyaha. Waxaanan dhalinyarada u balan qaadaynaa in loo dhisi doono garoonkii kubadda ee ay ku ciyaari lahaayeen.”
Sidoo kale Wasiirrada Wasaaradaha Madaxtooyada iyo Beeraha ayaa balan-qaaday inay wasaaradahoodu Xafiisyo ka furan doonaan degmada Allay Baday iyagoo ka mahadceliyay sida diiran ee ay Weftiga Madaxweynaha u soo dhaweeyeen.
Weftiga madaxweynaha Somaliland galabta ayay dib ugu soo laabteen caasimadda Hargeysa markii uu soo dhamaystay socdaal qaatay muddo laba maalmood ah oo uu ku soo maray degmooyinka Gobolka Gabiley.
Hoos ka daawo
Somalilandpost.net
Hargaysa
