Burco (SLpost)- Maxadka Faafinta Islaamka oo ka shaqeeya Arrimaha Baraarujinta Diinta, ayaa kulan-diimeed u qabtay 150 Arday oo kala socday Dugsiyada Sare ee ku yaala magaalada Burco.
Kulan Diimeedkan oo ku qabsoomay Hotel Barwaaqo ee magaalada Burco, waxa uu ku saabsanaa sidii ardayda loogu tabin lahaa fahamka saxda ah ee diinta Islaamku ka qabto tahriibka, Waalid-inkaarimada, adeecidda macalinka iyo is-qarxinta
Kulan waxa ka qayb-galay Guddoomiyaha Maxadka Faafinta Islaamka Sheekh Maxamed Cabdi Yuusuf (Mooge),Wakiilka Maxadka ee Gobolka Sanaag Sheekh Cawil Faatax Shirre, Wakiilka Maxadka ee Gobolka Saaxil Sheekh Saleebaan Siciid Cali, Macalimiinta iyo Ardayda Dugsiyada afar ka mid ah dugsiyada Sare ee Burco.
Sh. Maxamed Cabdi Yuusuf oo Gudoomiyaha Maxadka faafinta Islaamka oo kulankaasi ka hadlay ayaa ka warbixiyay hawlaha maxadkoodu ku qabto iyo waxyaalaha ay ka wacyigaliyaan dhalinyarada isagoo arintaasi faahfaahinaya waxa uu yidhi “ Waxaanu dhalinyarada ka wacyigalinaa Tahriibka , Isqarxinta iyo Waalid inkaarnimada, waxaana ugu sii daran waalid inkaarka , waayo haddii aanu waalid inkaar ahayn muu tahriibaaeen oo naftiisa badaha kuma haligeen , oo ma qarxiyeen naftiisa oo ,sidaas awgeed waa in laga fogaadaa waalid inkaarnimada oo la adeeca waalidka .” Ayuu yidhi.
Sh. Saleebaan Siciid Cali ,ayaa kulankaa maxaadarada si weyn ugu iftiimiyay in diinteenu xaaratimaysay in qof binu- aadam ah la daadiyo dhiigiisa, ilaahayna aanu banyan, ciddii samaysaaana tahay ehlu naar. Waxa kale oo Sh. Saleebaan intaas raaciyay in dhalinyarada looga baahan yahay inay raacaan jidka suuban ee ilaahay inoo jideeyay kana fogaadaan wax kasta oo halis galinaya naftooda.
Sh. Cawil Faatax oo ka hadlay kulankaasii ayaa isaguna ka jeediyay wacdi ku saabsan halista ay leedahay tahriibtu iyo is qarxintu, loogana baahan yahay dhaliyarada in ka fogaadaan wax kasta oo ilaahay inaga xaaran timeeyay.
Ardaydii ka qaybgashay muxaadaradan ayaa su, aalo ku saabsan mawduuca laga hadlayay waydiiyay culimadii, sidoo kalena culimadiina si wanaagsan oo qancisay ardaydii ayay uga jawaabeen.
Waa markii u horeysay ee muxaadiro noocan oo kale ah loo qabto ardayda dugsiyada sare ee Burco.
SLpost News Desk
Burco Office
Follow us On
