Jiiftadan waxa aan tiriyay 22/01/2013-ka markaas oo aan u geeddiyay Burco si aan uga qaybgalo Barnaamijka Waddaniyadda oo uu hormood ka ahaa Abwaan Axmed Axda.. Sooyaalka iyo doorka ay Burco ugu jirto Somaliland ayaa ay ka warramaysaaa…. Nuxurku waa dheehashada iyo akhriska maansada Beledkii Hal-doorka..
Waa kuwan meerisyadi
Baradii Togdheer iyo
Biixida dhulkeygaay
Burco ciid leh barakooy
Belelkii xornimadee
Ingiriiska baacsaday
Waaguu bakhtiyay amin
Geesiyaal bidhaanshoo
Ka afuufay boodhkaa
Burcooy lagugu ababshoo
Innagoon beryaba jirin
Waataynu booraan
Midnimiyo bilaash lura
Calankii ku bixinnee
Dib u-baadidoon qaran
Beryihii dagaalkiyo
Halgankeennu buuxsamay
Xaruntii bilawdee
Biimaha naf-huriddaa
Hadhcad loo badheedhaay
Geesiyaasha aan biqin
Halka lagu barbaarshee
Ku bogaadin mudataay
Inaan nahay dal buuxoo
Madaxii bannaan yahay
Halkii laga bayaanshaay
Fanka baallihiisiyo
Batar iyo tix iyo hees
Suugaan bahdeediyo
Abwaaniinta caanbaxay
Beledkii gardaadshoow
Haddii uunku baratamo
Waxa badiya ruuxii
Cilmi iyo buruud lee
Bandhigyada aqooneed
Bareyaasha ka u mudan
Bartii lagu xannaanshaay
Waxa dawlad bili kara
Diricii bulshada ay
Billaad maamul saartee
Madaxweynayaal bilan
Boqorrada intaw badan
Bayd lagu canqariyoo
Biyaheeda siisaay
Dalka beegsigiisiyo
Boggu horumar uu rabo
Dhaqaalaa baxnaanshee
Waxaad tahay bu’dii ay
Beertiyo wax-soosaar
Badigoobba xooluhu
Dhab ka soo burqanayeen
Culimada ku baaqdee
Barbar taagan diintiyo
Ganacsade bilkhayroo
Marka baahi loo qabo
Binidiisa dhiibaa
Baradaada joogee
Bigilkii xaqsoorkaay
Marka baadil uu dhaco
Boollida magaalkii
Boholaha ku tuurtaay
Anoon maanso badinayn
Burco iyo dadkeedoow
Birlab iyo hal-doorbaa
Guulluhu ku beegoo
Badhi-taarid mooyee
Baylah kama filaynee
Barkhad iyo riyaaq iyo
Ku bariista raynrayn Aamiin
Akadamiga Waxbarashada iyo Cilmi-baadhista (ERA)
Facebook: Saeed Mohamoud Gahair
Tell: 4428604/9169034
