Hargeysa(SLpost)-Agaasimaha Cusub ee Wasaaradda arrimaha dibada somaliland Cabdiraxmaan Maxamuud Abdeeq ayaa maanta si rasmi ah xilkii ugala wareegay agaasimihii hore ee wasaaradaasi Maxamed Xasan Siciid.
Munaasibad aad loo muuneeyay ayay labada Masuul xilalka kula kala wareegeen, waxaana ka soo qayb galay Wasiirka arrimaha dibada, wasiir xigeenka, shaqaalaha wasaarada, masuuliyiin iyo dadweyne kale.
Agaasimihii hore ee wasaaradda arrimaha dibadda Maxamed Xasan Siciid oo halkaasi ka hadlay ayaa yidhi “Waxaa uu xilkan madaxweynuhu ii magacaabey 2013 bishii July waxaana ay aheyd shaqadii saddexaad ee uu Madaxweynaha Jamhuuriyada somaliland ii magacaabo mudadii ay xukuumadani jirtey runtiina xilalkaas la ii magacaabey waxaa ay aheyn qaar la igala tashadey oo aan wax badan ka ogaa inta badanna dalab aan anigu dalbadey ku yimid”
“Maanta xilkan aan wareejinaayo waa xil aan anigu gartey in aan wareejiyo mudana aan ku hawlanaana in xilkan cidii qaban laheyd ee hanan laheyd aniga dabaday loo soo magacaabo dhawr jeerna madaxweynaha aan u gudbiyey istiqaaladeed waxanan maanta ku faraxsanahay in xalkii loo soo magacaabo Cabdiraxmaan Maxamuud Abdeeq oo aan is leeyahay waa masuul hanan kara shaqadan waxaanan leeyahay ku soo dhawoow” Ayuu Yidhi Agaasimihii Hore ee Wasaarada Arimaha Dibada Somaliland Mudane Maxamed Siciid Xassan
Sidoo kale waxaa isna dhinaciisa Hadalo kooban ka yidhi agaasimaha cusub ee loo soo magacaabey wasaaraddaasi mudane Cabdiraxmaan Maxamuud Abdeeq waxaana uu yidhi “ Marka hore waxaa mahadda iska leh madaxweynaha jamhuuriyadda Somaliland Axmed Maxamed Maxamuud Siilanyo oo gartey in uu xilkan ii magacaabo xukuumaddan waxaan odhan karaa waa xukuumaddii dhalinyarada waxaana aad ka garan kartaa waxaa xilka igu wareejinaya nin dhalinyaro ah waxaana la wareegaya aniga oo ah nin dhalin yaro ah”
“Runtii waxaan ku da daali doona sidii aan uga soo bixi lahaa xilkan la ii magacaabey waxaana shaqaalaha wasaardan shaqo wacan baan idiin rajeynayaa” ayuu yidhi agaasimaha cusub ee loo magacaabay wasaaradda arrimaha dibadda Somaliland Muddane Cabdiraxmaan Maxamuud Abdeeq .
Gabogabadii wasiirka wasaaradda arrimaha dibada somaliland Maxamed Biixi yoonis ayaa madasha ka jeediyey hadallo kooban waxaanna uu yidhi “ Waxaannu aad iyo aad u soo dhaweynaynaa Cabdiraxmaan Ab Deeq Agaasimaha cusub ee wasaaraddan loo soo magacaabay waxaana sidoo kale si kalgacayl ah aannu u sii sagootinaynaa Maxamed Xasan Siciid oo aad iyo aad noola shaqeeyey runtiina Maxamed Isaga ayaa talada goostey in uu shaqada ka tago istiqaaladiisii mar hore ayuu dhiibey aniga iyo madaxweynaha ayuu noo dhiibey balse waxaa aannu ka codsanay in uu in yar nala sii joogo aad iyo aadna waan kugu mahad naqaynaa in aad naga ajiibtey oo aad arinkaas aan kula nimid aad naga aqbashey maantana aad iyo aad baannu ugu faraxsanahay in uu badelkiisii oo cabdiraxmaan ahi nala joogo waxaana aanu leenahay soo dhawoow cabdiraxmaan “ ayuu yidhi wasiirka wasaarada arimaha dibada somaliland Maxamed Biixi Yoonis
Ugu danbeyntii wasiirka wasaarada arimaha dibada somaliland ayaa waxaa uu si rasmo ah xilalka ugu kala wareejiyey agaasimaha cusub ee wasaarada arimaha dibada iyo agaasimihii hore .
Follow us On
