Abwaanka Dhalinyarada ah Xasan Daahir Ismaaciil (Weedhsame) ayaa dhawaan magaalada London ee dalka Ingiriiska kaga qayb-galay Munaasibadda ay ku kulmeen hal-abuurka, qoraaga iyo xirfadleyaasha Soomaalida ah oo lagu magacaabo Somali Week Festival.
Somali Week Fastival ayaa ah todobaad lagu soo bandhigo Suugaanta Quruxda badan ee Ummadda Soomaaliyeed,waxaana Sannad walba lagu Casuumaa oo ka soo qayb gala Muxtarimka Ummadda Somaliland sida Abwaanadda Fannaaniinta Qorayaasha iyo Majaajilaystayaasha Caanka ah .waana Madal lagu Maalo Maskaxda dadkaas aan ka soo Hadalnay.Xasan Daahir Ismaaciil ayaa ah Abwaan ay dadweynaha Afka Soomaaliga ku hadashaa ay aad u jecel yihiin,Suugaantiisa ayuu in badan kaga hadlaa,wax u sheega iyo Hoga Tusaalaynta danaha kala gadisan ee dhinac walba leh,Abwaan Xasan ayaa ay dhinacyo badan wadaagaan Abwaankii waynaa ee Maxamed Xaashi Dhamac (Gaariye)Alle Naxariistii Janno ha ka waraabiyee,waxaanu ahaa Macalin uu wax badan Uu ka qaatay,Suugaantiisa ayaa u badan mid Run sheega oo Xaqiiqada ku dhisan,waxaanu inta badan isku Taxalujiyaa wax u sheega dhalinta Da’yar ee Tahriibku Daashaday,Maansooyinkiisa ayuu qaarkood kaga hadlaa dhinaca Jacaylka oo uu sidii aad Tilifishan daawanayso uu kuu soo hor dhigayaa SAWIR aad u qurux badan oo ay Dhif iyo Nadir tahay Abwaan sidiisa kuugu Sawiraya inaad Aragto Xiligan lagu jiro ee ay Suugaantu Macno beeshay ayaa wuxuu Abwaan Xasan ka mid yahay dhalinta Kor u soo Qaaday ee ka dhex Ifaysa Suugaalayda Sooomaaliyeed.
Hadaba Abwaan Weedhsame ayaa soo bandhigay Suugaan Mugwayn oo ka mida suugaantiisa aadka u quruxda badan ee looga bartay,waxaanu ku soo bandhigay Madasha Somali Week ee Sannadkiiba Mar lagu qabto Waddanka Ingiriiska Magaallo Madaxdiisa London oo uu ka mid yahay Marti Sharafta lagu soo Casuumay,waxaana sannad walba soo qaban qaabiya ururka kayd.
Dad badan oo iskaga kala yimid Magaalooyinka iyo Gobolada Wadankaas ayaa ka soo Qayb galay Bandhigaa Quruxda badan ee ay Nasiibka u yeesheen,Bandhiga noocana Ayaa sida ay sheegaan qaban qaabiyayaashu inay uga danleeyihiin,barashada Da”yarta Wadamada Reer Galbeedka ku nooli Afkoodii hooyo iyo sidii Umadaha kale Wadankan ku dhaqan loola Tartami lahaa haday noqoto xaga Afka Suugaanta iyo wixii la hal maal Oo dhan,waana Caways aad u Qurux badan oo ka soo qayb galayaasha Xasuusin doonta Isirkoodii iyo halkay ka soo jeedaan,Maadaama ay Dal Tabyo badan qabaan Unna Heelan yihiin dhagaysiga Suugaantoodii oo lagu yeedhinayo Afkoodii hooyo,oo Qaarkood ku Hadalka Afka ay Arkaan uun Xafladah Noocana oo Qudha.
Waxaana suugaantii madaxa loo lulay ee uu soo bandhigay ka mid ahaa kuwan: Maansada DULMI-NECEB oo ah Maanso Cusub oo uu Abwaanku sameeyey.
Maansado waxa ay ku bilaabmaysaa:
Maansooy dareeneey
Dacar iyo ladh oogmaay
Inkastoon dakana iyo
Dibindaabyo kugu qabo
Marna la igu kaa duro
Ragna iigu kaa dudo
Kuma dayrin karayoo
Duunyaabad ii tee
Ii darar bal gaaxdii
Rabi iigu kaa dara.
Labaan la isudari Karin
Degel ruuxa wada furay
Dannigiisu muu garan
Inay kala dib boodaan
Weheshiga dirsoociyo
Qarannimo danmidalihi
In qabyaaladiidura
Saddexdii dalaaqood
Lagu siiyo duuduub
Waynagii dorraad uun
Qallinada ku duugnaye
Sawtan doonnanee weli
Xisbiyada dumaashii
Dunta loogu wada xidhay
Geeddigii diyaarkii
Dib maxaa u soofuray
Buladkiyo dabayshii
Iyo lama-degaankii?
Doorashooyinkeenii
Dubaaxdooduyaab lee
Hungo lagu darleefiyo
Hibashiyo ka sii daran
Noqotaye xaggay deri
Dawakhnaye ka leedahay.
Dimuqraadinimadii
Dihataye hadday tahay
Doqonkani fariidka ah
Dirataye ha ii dudin
Dacartani macaanka ah
Dalbataye dibnaa saar
Durduradan harraadka ah
Duldegtaye ku oonbeel
Digo-rogashadeenaa
Sahan li’ dullaantoo
Wanqalkeedu dalabiyo
Dudmo uun ku koobnaa.
Maxaad doontayee dana
Maxaad diidayee daran
Maxaad door-bidee mudan
Maxaad deyrisee hadhay
Go’aan duunka weeyee,
Horta daacad maad tahay.
Ninka doortay wadarnimo,
Ninka daaley weheshiga,
Dan midaysa lama helo,
Shir-doceed nin lagu dhalay,
Shir-dugaalka uma bogo,
Ab-tirsiinta dalabta leh,
Axdi duuga kuma ogi,
Qaran daacad laga jiro,
Nolol doora kama sugo.
Dhidar doori lagu yidhi,
Dabcigaaga bahalnimo,
Hadalkaasi kama dego,
Dad shirqoolka lagu wado,
Dannigoodu jecelyahay
Digtoonowdu lama sama,
Gudindaab ku maqan yahay
Damal raagay kuma jabo,
Dhirta diirta lagu dhaqay,
Midhaheedu damac ma leh,
Didmo xaajo lagu galay,
Dawo ruuxna kama helo.
Qof dalaaqay garashada,
Dubbihiisu kama tago,
Inta aan la duri karin,
Nin duruufta noloshaba,
Doobigiisa ku sarjaray,
Deris baahan kama naxo.
Danyartiyo saboolkii
Deyntii ma siiseen
Mise duunyadoodii
Weli way dawarayaan? .
Miyuu yimi damiirkii
Dudayee maqnaan jiray
Saw weli dalluuntii
Dadnimadu ma hoostaal ?
Dulmigii miyuu furay
Daacaddii u mehersaday
Saw weli daryeelkii
Daranyada ma tuugsado?
Damacii miyuu nacay
Daribtii agoomaha
Dibjirkii gidaarrada
Saw weli ma daadsana ?
Hankiinii miyuu duray
Dulligii u qaayibay
Saw weli duqaydii
Dufankii ma raadshaan ?
Xaqsoorkii ma deyraa
Mooradiisu duugnayd
Saw weli dillaalkii
Dulmanaha ma dala’sado?
Ma shaley dullaameen
Ma xalay dayoobeen
Saakana ma diifbaa
Ma dulmay ku noolyiin
Sidii loo dulleeyaa
Weli loo dulyaallaa
Golayaashii dabatadu
Xeerar aan la deyinoo
Duuduub ku dhaafaa
Waa dabeecadoodee
Ka daree ma maantay
Dacartiyo dhunkaashii
Darsadeen wadaamaha?
Damiir-laawayaashii
Ma maantay ku doodeen
Marka aan ka daadago
Xilka duudka ii sudhan
Dan-yartaan ka baaqsaday
Doorkay filaayeen
Deyr-cadkoo daweyda ah
Aan ka sii dareersado.
Waxay nooga digayeen
Saw kuwan ku daakiray
Xaaraantii duufkii
Goormaa daliilkani
Xalaaleeyey soo degay
Kabo-qaad digreetiyo
Lagu keenay daadihin
Ma anaa dadweynaha
Duunyadooda hoo idhi?
