(Taariikhaha 5 Feb iyo 23 Feb iyo shaqsiyaadka xilka ummadda xilligan hayaba ,waxay ahaan doonaa qaar ay shacabka reer Somaliland xasuusan doonaan,wanaag iyo xumaan hadba kay ku xasuusan doonaana ILLAHAY ayuun baa og)
Xusuus:-
Madax badan oo ka mid ah madaxdii ugu saraysay Dowladihii Soomaaliya soo maray intii u dhacaysay 1960 ilaa 1991,waxaa ka maqlay iyagoo leh “Somaliland waxaa 1960kii ka yimid dad yaacaya,jibaysan,oo Somaliweyn madaxmartay,oo aan wax talo ah ku wada socon,taas ayaana keentay in ay waxba ku yeelan waayaan awoodii Dowladihii jiray xiligaas”
“Waanu u sii tashanay haddii aanu Soomaalidii Koonfurta nahay,oo waxaanu ku talo galay in aanu shuruudo ku xidhno,laakiin Woqooyi waxaa ka yimid dad iska yaacaya oo aanay waxba u diyaar ahayn”
Xusuuso:-
Md.C/raxman Axmed Ali(C/raxman Tuur) Madaxweynihii ugu horeeyey ee Somaliland (ILLAHAY naxariistii Jano ha siiyo,wuxuu yidhi:-
“Shacabka ayaa doortay gooni isu taaga Somaliland ,shacabka ayaa laga rabaa in ay ilaashadaan”.
“Waa laga yaabaa in aanu qaldano haddii aanu Siyaasiyiinta nahay,ee waa in Shacabku na ilaaliyaa,oo ay wadada saxa ah nagu toosiyaan”
“Reer Somaliland si yar ayaa jibo u qaadaa,waxaa fiicaan in aad iska ilaalisaan deg dega iyo jibada”.
“Waa in aynu iska ilaalinaa wixii ay 1960 kii ,inagu dhacay,waxaa fiican in aanay mar labaad inagu dhicin”
Xusuus:
Maxamed X.Ibrahim Cigaal-Madaxweynihii 2aad ee Somaliland ILLAHAY naxariistii Jano ha siiyo,wuxuu yidhi:-
“Qof caashaq ayeynu naqaanaa” “Weli inta aynu meel fadhiisanay ma isweydiinay maxaa inoo dan ah? “Way howl yar tahay sida la idiin karbaashaa” “ dan la iima dooran ee ILLAHAY ayaa ii qoray”—–Erayadaa waxaa Khayrida Hargeysa ka yidhi ILLAHAY NAXARIISTI JANO HA SIIYEE Madaxweynihii hore ee Somaliland Md.Maxamed X.Ibrahim Cigaal.
“Kuwii dhintay idiinkama baahna in aad u aartaan,idiinkama baahna in aad u ooydaan,kuwa nool ayaa idiinka baahan in aad badbaadisaan”
“Shalay jibo ayaa idin geysay Soomaaliya,maantana jibo ayaa idin keentay Somaliland,berina jibo ayaa idin geyn doontaa Soomaaliya”
Xusuus:-
Md:- Daahir Riyaalle Kaahin,Madaxweynihii hore ee Somaliland wuxuu yidhi:-
“Dumuqaraatiyada Somaliland maanta ka jirta waxaa aasaaskeeda lahaa Madaxweynihii iga horeeyey, ALLE ha u naxariistee Md.Maxamed X.Ibrahim Cigaal,anigu waan hirgeliyey,waana taas aynu maanta midhaheedii guranayno”
“Nabad aad keligaa haysataa waxba kuu tarimayso,waxaa ku dadaalay sidii aan wadamada deriskana ula heshiin lahaa,waxaan ka bilaabay Jaabuti,Itoobiya iyo Kenya “
“Walaalkay Ahmed (Siilaanyo) wuxuu nasiib u yeeshay in uu la wareego dal dhisan ,nbadad ah,wada jira,dadkiisii wada joogaan “!!
Xasuus:-
Abwaan Ibrahim Gadhle ILLAHAY naxariistii Jano ha siiyo!
Waar! hoy! dadkaygoow
Laba daan dhexdoodiyo
Dalqo bahal qof galayoo
Dirqi iyo tu fool adag
Debedda ugu soo baxay
Halkii shalayto lagu dilay
Ma dareemi waayee
Durba miyaa iloowdeen
Duunyadiinii dhacantiyo
In dadkiinii maqanyahay
Xusuus:-Abwaan Cali Sugule:-
Nina diric ahaantii
Daleel guusha kama helo
Dadkaa geesi lagu yahay.
Hadal iyo dhamaan ma layaga yaabaa in mar kale ay reer Somalilnd galaan qaladkii 1960kii ay galeen ? ma laga yaabaa in reer Somaliland ay markale iska yaacaan iyagoon aan wax shuruud ah la gelin Soomaaliya ?, suaalaha jawaabahooda runtii aad iyo aad ayey u adag yihiin xilligan,balse waxaa muuqda saansaan u eg tii 1960kii, xusuustaa faraha badan iyo halgankii dheeraa shacabka reer Somaliland soo galeenna wuxuu u muuqdaa “hal bacaad lagu lisay”
ALLAA MAHAD LEH
Qalinkii Abdi M.Saleiman(Mingiste)
Political Analyst
abdi_saleiman@hotmail.com