Hargeysa (SLpost)- Xukuumadda Somaliland, ayaa dhalinyarada ku dhaqan caasimadda Hargeysa uga digtay inay ka qayb-qaataan mudaharaadka ay Asxaabta Mucaaradku maalinta Berri u ballansan yihiin inay isugu baxaan shaaracyada Hargeysa, kaas oo ay kaga soo horjeedaan Cabbudhin iyo cadaadis xukuumaddu ku hayso xisbiyada iyo Warbaahinta madaxa-bannaan ee dalka.
Wasiirka Wasaarada Dhalinyarada Iyo Ciyaraha Iyo Dhaqanka Somaliland Mudane Cali Siciid Raygal Oo maanta xafiiskiisa kula hadlay warbaahinta, ayaa sheegay in ay ka wasaarad ahaan dhalinyarada ka wacyi galin doonaan mudaharadada iyo waxyaabaha aadka u foosha xun ee ay xubno reer Somaliland ahi ku dhawaqeen isaga oo dhalinyarada ugu baaqay inaanay ku dhex-milmin siyaasadda isla markaana ay ka waan-toobaan inay u hanqal taagaan baaqyada mucaaradka.
Wasiirka oo arrimahan ka hadlayey waxa uu yidhi, “Somaliland waxay maraysa marxalad horumar, waxaa lagu jiraa waxbarasho wakhti fiican, marxaladii shaqo doonka, waxaa lagu jiraa marxaladii qof walba uu iskii u noolaan lahaa ee uu isku maamuli lahaa. Waxaa lagu jiraa wakhtigii guud ahaan waxbarashada caafimaadka iyo adeegyada bulshada meel fiican la gaadhsiin lahaa looma baahna cid fara faraysa nabadgalyada iyo Somaliland. Dhalinyarada Somaliland waxaan leeyahay maanta waxaynu ku fadhinaa nabdgalyo iyo wanaag, waxwalibana waxay sharaf-ku leeyihiin wanaagga iyo nabad galyada lagu fadhiyo. Dhalinyarada Somaliland waxaan uga digayaa meel kasta oo ay joogan inaan laga fa’iidaysan oo aanay ka fa’iidaysan dadka maangaabka ah ama dad dano gaara ah leh oo doonaya in wax aanay garanayn ku shaqaystaan, waxaanan ugu baqayaa inay ka digtonadaan waxaas dhacaya. “
Mudane Cali Siciid Raygal oo hadalkiisa sii wata ayaa waxaa uu intaasi raaciyay, “Dhalinyarada waxaan kala dardaarmayaa dawladkasta iyo meelkasta Somaliland markay wax uga kordhaan ee cilmiga iyo aqoonsiga wax uga kordhaan, cadawgeedu wuu sii badanayaa meelkasta waa lagaga iman karaa siyaabo kala duwan oo qofku uu iskaga dhigayo muwaadin ayaa lagaga soo gali karaa. Dhalinyarada Somaliland waxaan leeyahay ha ka digtoonadaan, waa in ay ogadaan distoorka dalka iyo xeerarka dalku waxa ay qeexayaan. Qodobka kaliya ee ugu fududna waxaa weeyaan cid kasta oo doonaysa inay wax ku dhaqaaqdaa waxaa weeyi in ay shuruucda dalka ilaaliso, dhalinyaradana waxaa weeyaan in ay fahmaan dastuurka iyo sharciga dalku waxaa uu dhigayo. Xeer-ka axsaabta iyo ka sharuucda iyo ka dalka u yaala waa in ay cidkastaa marto waxii aan waxaas ahayn ee qarda jeex ah looma baahna,” ayuu yidhi Wasiirka Dhalinyarada, Ciyaaraha iyo Dalxiiska Somaliland.
Wasiirku waxa kale oo uu yidhi, “Waxan idiin sheegayaa lagumo jiro xili doorasho xili kaambayn, qofkastaana isaga oo xora ayaa markay timaado uu xisbiga u doonayo u ololaynayaa oo xisbiga uu doono ayaa uu codka siinaya, laakin maanta ma taagna wakhti tartan iyo wakhti doorasho toona, waa in ciddii doorasho u baahan ama doonaysa cid inay cod siiso xiligeeda ay sugtaa.”
Xisbiyada Mucaaradka ah ee UCID iyo WADDANI, ayaa ku dhawaaqay inay mudaharaad salmi ah ka dhigayaan caasimadda Hargeysa, iyaga oo taageerayaashooda gobolka Maroodijeex ugu baaqay inay kala soo qayb-galaan bannaan-baxaas oo ay u muddeeyeen 10-ka bisha Decmeber oo ku beegan maalinta Berri ah.
SOMALILANDPOST.NET
contact@somalilandpost.net
