Hargeysa, (SLpost)- Xukuumadda ayaa jawaab ka bixisay go’aamadii bayaankii ay ka soo saareen shirkoodii xisbiyadda mucaaridka ahaa oo sheegay inay caalamka ugu baaqayaan inay soo dhex galaan khilaafka ka dhashay dib u dhaca doorashooyinka.
Wasiirka wasaaradda Shaqadda iyo Arrimaha bulshadda ee Somaliland Dr. Cabdi Aw Daahir Cali, oo xalay qoraal kooban oo uu arrintaasi kaga hadlay ku baahiyay bogiisa uu ku leeyahay barta xidhiidhka bulshadda ee Face-book-ga.
Wasiirku waxa uu ku dooday in go’aamadii ay asxaabta mucaaridku soo saareen ay lidi ku yihiin qaranimadda Somaliland.waxaanu qoraalkiisu u dhignaa sidan:- “Go’aanka axsaabta mucaaridku soo saareen wuxuu ku lidi yahay go’aankii maxkamadda dastuuriga ah. Waayo hay’adaha caalamigu ma aha gole sharci ee waa caawiyeyaal.
Waxaan akhriyay go’aamaddii ka soo baxay Shirkii xisbiyadda. Marka laga tago qodobbada Toro-rogta u badan iyo qoddobka afraad oo ah mid ay axsaabtu ku xad-gubtay qodob Dustuuri ah. Waxaanu isla oggolayn sida heshiiska Ku qoran :
- In la ixtiraamo go’aankii Guurtida
- In axsaabtu Ka heshiiyeen wakhtiga Doorashadda.
Haddaba Madaxweynuhu Wuxuu Ku dhawaaqay in waxaynu Ku heshiinay laga ansixiyo golaha Baarlamaanka (GUURTIDA), halka ay axsaabtu qoddobka shirkooda shalay uu Nuxurku ahaa waa arrinkii aan Ku heshiinay aan dawlado kale u bandhigno. Ma aha mid suurto-gal ah, wax-tar ah, oo sharciga waafaqsan”.