Hargeysa (SLpost)- Wasiirka Wasaaradda Dhalinyarada iyo Ciyaaraha Somaliland Md Cali Siciid Raygal iyo Guddoomiyaha Dalladda Ururrada dhalinyarada Somaliland ee SONYO Mubaarig Ismaaciil Taani, ayaa ka hadlay muhiimadda uu leeyahay iyo qorsheyaasha loogu talo-galay sanduuq loogu talo-galay horumarinta dhalinyarada dalka oo madaxweyne Siilaanyo dhowaan ku dhawaaqay.
Madaxweynaha Somaliland Md Axmed Maxamed Maxamuud (Siilaanyo) oo 20-kii Bishan ka qayb-galay munaasibad uu xadhigga kaga jaray dhise cusub oo loo dhisay wasaaradda Dhalinyarada iyo Ciyaaraha Somaliland, ayaa halkaas ka dhawaaqay sanduuq dhaqaale oo loogu talo-galay horumarinta iyo kor-u-qaadista barnaamijyada dhalinyarada dalka, waxaanu madashaas ka sheegay inuu madaxweyne ahaan sanduuqaas uu ku riday qaadhaankii ugu horreeyey oo tiradiisu dhammayd Boqol Kun oo Dollar.
Wasiirka Wasaaradda Dhalinyarada iyo Ciyaaraha iyo Guddoomiyaha Dalladda Dhalinyarada ee SONYO oo u warramay Shabakadda Somalilandpost.net iyo Wargeyska Himilo, ayaa faahfaahiyey qorsheyaasha loo qoondeeyey sanduuqan, qaabkii uu ku dhashay fekerka lagu aasaaskiisa iyo cidda maamulkiisa gacanta ku hayn doonta, ayaa si qoto-dheer uga war-bixiyey kaalinta uu barnaamijkani ka geysan karo isbeddel dhinacyada shaqo-abuurka iyo waxbarashada ah.
Wasiirka wasaaradda Dhalinyarda, Ciyaaraha iyo Dhaqanka ee Cali Siciid Raygal, ayaa tallaabada lagu hirgeliyey saduuqan ku tilmaamay mid horseed u noqon doonta xal wax ku-ool ah oo laga gaadho dhibaatooyinka dhalinyarada ka haysata dhinaca shaqo-la’aanta iyo tahriibta.
Md Siciid Cali Reygal oo aanu weydiinnay cidda gacanta ku hayn doonta maamulka sanduuqan, ayaa sheegay in Gudi isku dhaf oo ka kooban qaybaha Bulshadda iyo Haay’adaha Caalamiga ah loo magacaabi doono Sanduuqa Horumarinta, isaga oo intaas ku daray in siyaasadda xukuumadda ee ku wejahan dhalinyarada ay horseedday in la hirgeliyo sanduuqan oo markii hore fekerkiisa ay si wada-jir ah madaxweynaha ugu gudbiyeen Wasaaradda Dhalinyarada iyo Dalladda SONYO.
Dhanka kale, guddoomiyaha Dalladda ururrada dhalinyarada dalka ee SONYO Mubaarik Ismaaciil Taani oo dhinaciisa aanu wax ka weydiinnay kaalinta uu dhaqaalaha sanduuqani u buuxin doono baahiyaadka kala duwan ee wakhtigan ku xeeran dhalinta dalka, ayaa si faahfaahsan u sharraxay ujeeddada laga leeyahay iyo qaabkii fekerka aasaaska sanduuqani ku dhashay.
Guddoomiyaha SONYO oo arrimahan ka hadlayey, waxa uu yidhi, ”Dallada Sonyo iyo wasaarada Dhalinyarada iyo ciyaaraha ayaa aad uga soo shaqeeyey, door laxaad leh ayaanan dalad ahaan ka soo qaadanay, oo aan doorkii ugu badnaa ku tilmaami karo. Waayo Sanduuqa horumarinta dhalinyarada Somaliland, wuxuu ka mid yahay, Siyaasada horumarinta dhalinyarada ee qaran (National Youth Policy) oo hore golaha wasiiradu u ansixiyeendhamaan baahiyaha kala duduwan ee dhalinyartu ay qabaan.”
”Qaabka loo horumarinayana waxaa loo sii marayaa siyaasadaa qaran, si loo fuliyana waxa la sii marayaa sanduuqan horumarinta dhaliyarada (Youth Development Fund) kan. sanduuqan waxa ujeedadiisu tahay inuu sanduuq qaran noqdo, oo miisaaniyada qaranka bajad ku yeesha, boqolkiiba hal ama boqolkiiba laba , kolba intii la isla garto ku yeesha,” ayuu yidhi Guddoomiyaha SONYO.
Mr Mubaarig oo ka hadlayey muhiimadda uu sanduuqani u leeyahay dhalinyarada, waxa uu yidhi, ”Sanduuqu wuxuu noqonayaa, meel ay ka doontaan dhalinyaradu , hayn iyo hanti ay ganacsi ku furtaan oo iskoodna ay u shaqaysan karaan, dhalinyar badana ay shaqo ugu abuuri karaan. Wuxuu fursad siinayaa oo sanduuqani maal-galin doonaa , meelaha dhalinyartu ay gaarka u leeyihiin.”
Mar aanu weydiinnay cidda gacanta ku haynaysa maamulka sanduuqan, waxa uu guddoomiye Mubaarig yidhi, ”Sanduuqani wuxuu noqonayaa mid madax banaan oo leh guddi maamula oo madax banaan, guddidaasi , waxay isugu jiri doonaan ururada dhalinyarada, hayadaha caalamiga ah, gaar ahaan kuwa dhalinyarada ka shaqeeya, ganacsatada ama ururada bulshada, waxaa kaloo ku jiri doona wasaaradaha dhalinyarada ka shaqeeya.”
SOMALILANDPOST.NET
