Qaahira (SLpost)- Shabakadda Caalamiga ah ee SomalilandPost waxay fursad u heshay inay idiin soo gudbiso xog in badan daah ku rognaa oo dad badanina su’aalo iska weydiinayeen sababta ku kalliftay Kornayl Qaddafi inuu ilaalladiisa gaarka ah ka dhigo hablo da’ yar oo wada Gashaantimo ah.
Mid ka mid ah ilaaladdii sarsare ee Kornayl Qaddaafi oo u warrantay mid ka mid ah saxaafadda reer Bariga ayaa iftiimisay xogo badan oo ku duugnaa sirta ka dambaysa nooca ilaalada hoggaamiyaha baxsadka ku jira ee Liibiya.
SomalilandPost.net oo soo xiganaysa waraysi ay gabadhani siisay jariiradda Daily News and Analysis oo ka soo baxda dalka Hindiya, waxay ka warrantay waxyaabo badan oo la xidhiidha shaqadeedi askarinimo, sida loogu xushay iyo waxyaabaha ay qaban jireen.
Sarkaaladan oo wakhtiga waraysiga laga qaaday ku sugnayd xarun ciidamadda Mucaaridka dalka Libya leeyihiin oo ay maxbuus ahaan ugu jirto, ayaa ugu horayn ka warrantay sidii goobta ay ku xidhan tahay ay ku timi, waxaanay tidhi, “Dhawr cisho ka hor ayaa la igu soo qabtay dagaal qadhaadh oo u dhexeeyay ciidamadayadii iyo kuwa mucaaridka ah, dagaalkaas oo ay ku dhinteen dad badan oo aan muddo soo wada shaqaynay iyo kuwa aan aad isugu dheerayn.”
Intaa ka dib waxa haweenaydan la waydiiyay xiligii ay shaqada gashay iyo wixii shuruudo lagu xidhay ama guud ahaan lagu xidhi jiray hablaha kale ee dhigeeda ah ee ka midka noqonaya ciidamada ilaalada Qadaafi, waxaana ugu muhiimsanaa inay gabadha ilaalada u noqonaysaa ay bikir tahay isla markaana aanay weligeed guursanayn inta ay u shaqaynaysay, iyada oo arrimahan ka hadlaysa waxay tidho, “Waxaan ilaalada hogaamiyaha ka mid noqday sanadkii 1984-kii, ilaa xiligaasna waan ka tirsanaa, maan guursan oo xaas looma ogola hablaha ilaalada ka tirsan, waxaa la siin jiray tababar adag, shuruudaha ugu badan ee hablaha ka midka noqonaya ciidanka lagu xidhi jiray waxay ahayd, inay tahay gabadh dheer oo laf leh, xaga quruxdu may ahayn wax sidaa u sii wayn.”
Gabadha ka mid noqonaysa ilaaladiisa ayaa marka ugu horreysa ku dhaaranaysa inay nafteeda isaga u hureyso isla markaana aan la guursan karin intay shaqada ku jirto. Waxa ka sii daran, inaanu u dulqaadan doonin gabadha nin kale iska jeclaata isla markaana la ciqaabayo haddii ay ku dhacdo.
Colonel Caa’isha Cabdi Salaam oo la waydiiyay sababta Qadaafi ilaaladiisa uga dhigan jiray dumar, ayaa sheegtay in taas ujeedada ugu badan ee uu ka lahaa ay ahayd, sidii aduunka uu ugu muujin lahaa in haweenka reer Libya haystaan xuquuq la siman ta raga oo kale shaqo kastana ay qabtaan. Sidoo kale ayay ku tilmaantay hawsha ay qaban jireen inay ahayd mid adag, imikana dareemayso sidii qof dhakhtarka xanuunka dhimirka ka soo baxay oo kale. Tirada hablaha caadiyan u raaci jiray Qadaafi ama la safri jiray ayay sheegtay inay dalka gudihiisa ahaan jireen saddex halka safarada dibadana ay ku wehelin jireen ilaa afar hablood. Sida ay ku warantay gabadhani had iyo jeer waxa safka hore ku jiray, hablaha dhaadheer ee xitaa marka ay Qadaafi daba istaagaan aad uga madaxa fiiqan.
Sida ay shaqadan u arkayeen iyo kalsoonida ay ku qabeen iyadoo ka hadlaysa waxa ay tidhi, “Aad baan u jeclayn, waxaan u arki jirnay inay tahay shaqo sare, waxaanu ahayd cida ugu dhow hogaamiyaha, waxaan lahayn mushahar badan, tixgalin dheeraad ah, qadarin balaadhana wadanka waanu ku lahaan jirnay.” Colonel Caa’isha Cabdi Salaam ayaa xustay in aan is qurxin badan loo ogolayn, fasaxooduna aad u yaraa. Adkaysiga iyo waxyaabaha ay raga kaga marmeen mar la waydiiyay ayay sheegtay in gabadh kasta oo ciidanka ka tirsani ku soo biirtay iyadoo aad da’deedu u yar tahay, sidaa daraadeedna aanay wax badan oo fikir ah aanay ka haysan arrimaha guurka iyo lamaanaha, waxaanay si adag u beenisay in la siin jiray dawooyin hamadda kala dagaalama iyo waxyaabo la isku ilowsiiyo guurka.
Kornayl Qaddaafi ayaa sannadkii 1984kii waxa uu sameeyay guuto isaga ilaalisa oo lagu magacaabo AMAZONS taas oo ka kooban gabadho da’ yar oo qaarkood uu isagu soo koriyay.
Waxay ahayd sannadkii 1998kii oo Islaamiyiin Liibyaan ahi weerar ku qaadeen Qaddaafi oo booqanaya deegaan ka tirsan dalka Libya. Weearkaas waxa ku dhintay mid ka mid ah ilaaladiisii uu ugu jeclaa halka qaar kalena ku dhaawacmeen. Sarkaalladdan dhimatay ayaa nafteeda miinaysay ka dib markii ay rasaas isaga dhigtay Qaddaafi.
Somalilandpost.net
Editor@somalilandpost.net
