Hargeysa (SLpost)- Xisbiga mucaradka ah ee UCID ayaa ku eedeeyay xisbiga Waddani in aanu danayn in xal laga gaadho muddo kordhinta golaha guurtidu u sameeyay xukuumadda iyo golaha Wakiiladda.
Guddoomiye ku xigeenka 3-aad ee xisbgia UCID Cali Maxamed Yuusuf (Cali Guray), oo shalay warbaahinta la hadlay waxa uu sheegay in wada hadaladii u socoday labada xisbi mucaarad, xisbiga Kulmiye iyo xukuumadda ee ay kaga wada hadlayaan muddo kordhinta golaha Guurtidu u sameeyeen xukuumadda iyo golaha Wakiialda iyo dib u dhaca ku yimi doorashooyinka in aanu xisbiga WADDANI la iman xal siyaasi ah oo lagu heshiiyo isla markaana doorashooyinku ku qabsoomaan.
Mujaahid Cali, ayaa u soo jeediyay xisbiga WADDANI inay ka waantoobaan dacaayadaha ay ka fidinayaan xisbiga UCID, waxaanu ku hanjabay in aany ka xisbi ahaan wax danbe dadka ka qarin doonin, bal se ay soo bandhigi doonaan natiijada ka soo baxda wada hadalada maanta ay isku soo hor fadhiisan doonaan xisbiyadda mucaaradka ah xisbiga Kulmiye iyo xukuumadda.
“Waad ogaydeen maalintii wada hadaladu bilaabmayeen in aan soo jeediyay in saxaafada la daayo oo ay u gudbiyaan dadka masiirkooda dadka ka talinaya waxa ay ku hadlayaan lamina ogalaan, imikana dhuxudhux iyo dacaayado ayaa la wadaa”ayuu yidhi Cali Guray.
Waxa kale oo uu sheegay in wada hadaladii u socday saddex xisbi qaran iyo xukuumada in xisbiga Waddani uu caqabad ku yahay in xal laga gaadho. Waxaanu yidhi “Garanay Kulmiye waa xisbul xaakim dawlad iyo madaxweyne ayay is-dhex wataan, waxaanu anaga oo UCID ah iyo Waddani laba xisbi oo mucaarad ah oo safkayagu inuu mid haado ay ahayd, laakiin marka la yidhi la kaalaya xal siyaasi ah oo macnihiisu yahay in aan cidina teeda wada helin.
Waddani taayadiina naguma raacin xal uu keenayna ma jirro, iyaga ayaana dacaayadaha suuqa ka wada waxaanu leenahay madaxweyne ku xigeenku wuu noo markhaati furay in xisbiga UCID yahay xisbiga la yimid xal siyaasiya ama ha lagu raaco ama ha lagu diido, wax danboo inoo qarsoonaanayaa iyo wax danbe oo dadka laga qarinayaa ma jiro”.
“Haddii maalinta Isniinta ay noqoto anaguna halkayagii ayaanu taaganahay, anaguna halkayagii ayaanu taaganahay, macnuhu waxa weeye doorasho ma dhacayso, doorasho waxa ay ku dhici kartaa waxa aynu ku heshiino” ayuu yidh Cali-gurey.
Somalilandpost.net
