Burco (SLpost)- Wefti ballaadhan oo uu hogaaminayo Badhasaabka Gobolka Togdheer Axmed Cumar X. Abdillahi (Xamarje), ayaa kormeer  ku maray degmooyinka hoos yimaadda gobolkaas.
Kormeerkan oo ku saabsanaa xog-ogaal u noqoshada baahiyaha iyo wax-qabadka ka socda degmooyinka gobolka togdheer , ayaa waxaa guddoomiyaha ku weheliyey taliyaha qaybta Booliska, Maayirka Degmada Burco, Xildhibaano golaha deegaanka Burco ah,  Isuduweyaasha Wasaaradaha Waxbarashada, Caafimaadka, Macdanta iyo biyaha, Xanaanada Xoolaha, Deegaanka, Beeraha, Qorshaynta,  Hawlaha guud iyo Hay’adda shaqaalaha.
Sidoo kale Socdaalkan uu badhasaabku ku gaalaa-baxay degmooyinka gobolka Togdheer, waxaa kaloo ku weheliyey Haayadaha caalamiga iyo kuwa wadaniga oo ay ka socdeen Caritas, Mid Air, Bisha Cas , NRC, Havayaco iyo Candlight.
Waftigaas oo mudo laba maalmood ah kormeerayey si dhab ahna ugu kuur -galay baahiyaha xaasaasiga  ah ee ka jira dhamaan deegaanadan ama degmooyinka gobolkan hoos yimaada oo kale ah :
Waraabeeye, Harada guba texel ,Yucub yabooh ,Bisiqa, Duriqsi , Riyo xidho, Dhoqoshay , dhagax dheer, dharyalay, Balay dhiis, Taala buur, Balay calanle, Qorilugud, Shanshacade, Warcimraan , Qoryaalay.
Muddadii uu waftigani ku gudo-jiray Kormeerka, waxaa aad u soo dhaweeyay dhamaan Odayaasha, Haweenka iyo dhalinyarada Degmooyinkaasi. Iyagoo aad ugu riyaaqay masuuliyiinta qaran ee booqashada ugu yimi.
Gudoomiyaha gobolka Togdheer ayaa dadkii degaanadaasi u iftiimiyay ujeedada dhabta ah ee ay u socdaan oo uu sheegay in ay tahay sidii ay u ogaadaan lahaayeen baahiyaha  ka jira deegaamadaas islmarkaana uu ku indho-indhaynayo waxa u qabsoomay Haayadaha kala duwan ee dawliga ah ee gobolkaasi ka hawl-gala.
Dhamaan dadwaynihii deegaanadaasi ayaa si farxad leh usoo dhaweeyey weftiga. Waxaanay ugu hambalyeeyeen si niyad-sami ah, iyagoo sheegay in weligood aanay arag wafti baaxadaas leh oo u kuur galay baahiyahooda. Marka laga reebo ayey yidhaahdeen xilliyada olalaha oo ay sheegeen inay soo mari jireen Kolonyada Cod urursiga uun u socda.
Waftigaasi ayaa intii ay ku gudo-jireen kormeerka la kulmay baahiyo badan oo ka jira deegaamadaasi, waxaanu gudoomiyaha gobolka togdheer iyo waftigiisuba ay ku ballan qaadeen in si dhakhso ah ay uga hawl-gali doonaan wax ka qabashada dhibaatooyinka ka jira deegaanadaasi kala duwan.
Guud ahaan gobolka Togdheer waxa ka curtay roobabkii Gu’gu, Waxaana gabi-ahaanba dhulkii uu weftigu maryey jiifay xareeddii raxmaadka. Waxaana si mug leh u jabay abaarihii ka jiray degaanadaasi.
SOMALILANDPOST.NET
