Hargeysa (SLpost)- Sheekh Almis Yaxye Xaaji Ibraahim oo ka mid ah Culimada waaweyn ee magaalada Hargeysa, ayaa talooyin xambaarsan hoga-tusaaleyn iyo dar-daaran u jeediyey Saxaafadda Madaxa-bannaan iyo Xukuumadda Madaxweyne Siilaanyo.
Sheekh Almis waxa uu warbaahinta madaxa-bannaan ku boorriyey inay dhiiri-geliyaan isla markaana xoogga saaraan gudbinta dhawaaqa iyo xannuunka bulshada jilicsan ee dhibaatadu haysato.
Sheekha oo todobaadkii hore hadal dar-daaran iyo tusaaleyn ah ka jeediyey kulan lagu faaqiday caqabadaha warbaahinta horyaala iyo sidii xal loogu heli lahaa oo daladda SONSAF soo qaban-qaabisay, waxa uu sidoo kale xukuumadda u hoga-tusaaleeyey faa’iidada ugu jirta dhaliilaha maamulkeeda loo jeediyo.
“Kalmadu illaahay agtiisa qaali bay ku tahay, kelmad ayaa janada lagu galaa, naartana kalmad ayaa lagu galaa, kalimatu Tawxiid. Nabi Muxamad NNKHA Konton maalmood ka hor dhimashadiisii waxa uu yidhi, ‘kelmad baa janno lagu mutaystaa, kelmadna naar baa lagu mutaystaa’, Isaga oo maalin saxaabadiisii la fadhiya ayaa waxa uu yidhi Axadkiin kelmad uu ku hadlaa Illaahay bay cadho galisa, isagu ma oga oo naar buu ku mutaystaa, Axadkiina kelmad buu ku hadlaa ama qoraa kelmadaasi illaahay bay farxad galisaa, isagu ma oga, Januu ku mutaystaa,” ayuu yidhi Sheekh Almis, waxaanu yidhi isaga oo hadalkiisa sii watay, “Maamulka jooga iyo ku soo socdaba marka laga hadlayo ee saxaafad lagala hadlayo amase lagula hadlayo qaab suugaaneed, duruus, khudbado, cilmi baadhis iyo aqoonba waxay tahay in maamulku u qaato kelmadii Cumar binu Khadaab yidhi ee ahayd “Illaahay haw naxariisto qofka hadyad igu siiya ceeb aan leeyahay’, markaa anniga maanta meel aan joogo laygu yidhaahdo waxaas iyo waxaas ayaa kaa khaldan colaad iyo xumaan uma qaadanayo ee waxaan odhanayaa wuu kula toosinayaa malaha. Markaa maamulka waxaan leeyahay haw qaataan sidaasi. Waayo Cumar Binu Khadaab madaxweyne ayuu ahaa oo adduunka dalool ilaa laba dalool ayuu ka talin jiray.”
Sh. Almis oo ka hadlayey doorka saxaafaddu ka geysan karto ka-qayb qaadashada baahiyaha haysta bulshada inteeda jilicsan, waxa hadalkiisa ka mid ahaa, “Saxaafada waxaan leeyahay inta jilicdasan iyo inta dhibaataysan dadkaaga Taahooga iyo Xanuunka ka baxaya noqo codkii qaadi lahaa, oo ha noqon mid lagu shubto.
Anniga arrin ayaa bishii ugu danbaysay iga soo martay saxaafada dalka oo aan shaqsiyan la yaabay; Inan yar oo xafiis hay’adeed ka shaqayn jirtay oo shaqaalahoodii ay si iskugu dhac dhaceen, taaheedii iyo xanuunkeedii ayey doontay inay u sheegto saxaafadda.
Wargeysyada dalkeena kuwa ugu waa weyn ayaa ka shaqeeyey inay Inantaa yar ku xidhaan xanuunkeeda iyo dhawaaqeeda aanu kor u soo bixin, $100 ilaa $300 oo meel loogu dhajiyey awgeed,” ayuu yidhi Sheekh Almis.
Sheekha oo hadalkiisa sii watay, waxa uu yidhi, “Gabadh madow oo Maraykan ah oo kortay bas dad cadi saarnaayeen ayaa dirawalkii ku yidhi ka deg kursigaa inaad ku fadhiisato xaq uma lihid. Gabadhii way diiday inay kursigaasi ka degto, waxay noqotay inay hogaamiso xorriyad-doonkii dumarka madow ee Maraykanka. Gabadhaasi weedheeda iyo taaheega Warbaahintaa Qaaday oo gudbisay, oo meel walba gaadhsiisay, sidaasi darteed, waxaanu ku fikiraynaa inaynu ku noolaano meel warbaahintu xor tahay, laakiin cidda koowaad ee ay u gurmanaysaa ay tahay in mujtamaca ugu jilicdasan ay arkaan inay u iman karaan oo ay u sheegan karaan una qaadi karaan dhawaaqooda iyagoon shilin haysanin,” ayuu yidhi Sheekh Almis.
SOMALILANDPOST.NET
