Hargeysa, 10 January, 2012 (SLpost)- Wasiirka wasaarada qorshaynta qaranka Dr.Sacad Cali Shire ayaa maanta uga waramay Gudida joogtada ah ee Golaha Wakiilada hawlaha waxqabad ee Wasaaradan u hirgalay sannadkii tagay iyo qorshayaasha ku talo gal ee sannadkan .
Waxaa ugu horayn halkaasi ka hadlay Gudoomiyaha Gudida Joogtada ah ee Golaha Wakiilada Mudane Maxamed Barkhad Miigane, waxaanu uga mahadceliyay Wasiirka Qorshaynta iyo Mas’uuliyiinta kale ee wehelinaysay sida ay u soo ajiibeen yeedhmadooda isagoo xusay in gudidooda uu xil ka saaran yahay sidii ay isugu sii duba ridi lahaayeen warbixinta golahooda ay hor dhigi lahaayeen marka ay ka soo noqdaan fasaxa .
Wasiirka wasaarada qorshaynta qaranka Dr.Sacad Cali Shire ayaa madashaasi ka soo jeediyay warbixin dheer oo dhinacyo badan taabanaysa isagoo xusay in qaab dhismeedka wasaaradani uu u qaybsan yahay Shan waaxood oo kala ah Waaxda Maamulka,Xog ururinta,Qorshaha,Horumarka iyo Isu duwida deeqaha waxa uu Wasiirku iftiimiyay waax kasta waxa u qabsoomay sannadkii tagay isagoo sheegay in wasaaradani ay qaranka uga mas’uul tahay
· Soo ururinta xog dhamaystiran oo ku aadan baahiyaha bulshada iyo dhaqaalaha dalka
· Diyaarinta Qorshayaal heer Qaran,Gobol iyo Degmo
· Abaabulida khayraadka Wadanka .
· Inay diiwaangeliso,isla markaana xidhiidhiso hay’adaha wadaniga ah iyo kuwa caalamiga ah.
· Iyo inay hubiso mashaariicda la maalgeliyo inay u fuleen sidii ugu haboonaa
Wasiirka wasaarada qorshaynta qaranku inay soo saareen markii ugu horaysay aragti heer qaran ah oo horumarka dalka ah isla markaana ay diyaariyeen Qorshaha waxqabad ee shan sannadood ee soo socda waxaa kale oo uu sheegay inay sameeyeen xog ururino taabanaya baahiyaha aasaasiga ah ee bulshada.
Wasiirka wasaarada qorshaynta qaranka Dr.Sacad Cali Shire waxa uu tilmaamay inay sannadkii tagay ee 2011 ka ay u hirgaleen Sharciga lagu hagayo ururada iyo hay’adaha caalamiga ah kaas oo ka soo baxay golayaasha sharci dejinta isla markaana uu si rasmi ah u dhaqan galiyay Madaxweynaha JSL
Wasiirka wasaarada qorshaynta qaranku waxaa kale oo uu ka hadlay ku talo galka sannadkan aynu ku guda jirno ee 2012-ka waxaanu cadeeyay inay u qorshaysan tahay arrimahan
· Inay u hawlgalaan sidii loo heli lahaa Jawi siyaasadeed oo fududeeya dhaqan gelinta qorshayaasha u degsan
· Inay maal gelin u raadinayaan Qorshaha 2012 ilaa 2016
· Wacyigelin badan oo ay ka samayn doonaan sidii aynu qaran ahaan u heli lahayn Cunto inagu filan iyo
· Inay tayeeyaan hay’adaha samo falka ah iyo kuwa wadaniga ah.
Somalilandpost.net
webmaster@somalilandpost.net
