Hargeysa (SLpost)-Wasiiru-dawlaha Wasaaradda Maaliyada Somaliland. Cismaan Cabdilaahi Saxaradiid (Cadaani), ayaa Xisbiga Waddani ku Eedeeyay inay ka baayac mushtareynayaan shirka London, isaga oo sheegay inaanu garanay talo Qaran waxa uu uga jeedo Af-hayeenka Xisbiga Mucaaradka ah ee Waddani, waxaanu ku dooday in talo Qaran Madaxweynaha Somaliland ay Ummaddu u dooratay inuu Dalka Siyaasaddiisa hago mid gude iyo mid debaddeed-ba.
Wasiiru-dawlaha Wasaaradda Maaliyada Md. Cismaan Cabdillaahi oo maanta Xafiiskiisa shir Jaraa,id ku qabtay, waxa uu si adag u sheegay in Inan yar oo Af-hayeen ah aanu ogaan-karin In waraaqo Martiqaad ah ay Madaxweyne Axmed Siilaanyo Xafiiskiisa soo gaadheen.
Md. Cismaan Cabdillaahi Saxardiid, Waxa uu sheegay in sababta shirka aan looga qayb-galayn tahay arrin is ka cad Ummadda Reer Somaliland oo dhamina ay garanayso, isla markaana waxa uu sheegay in Madaxweyne Silaanyo yidhi haddii shirkaasi yahay mid la mid ah shirarkii hore oo kale ay ka qayb-galayaan, waxaanu yidhi, “Sababta shirka aan looga qayb-galayn waxa weeyaan arrin is ka cad Ummadda Reer Somaliland oo dhamina way aragtaa,waxa weeyaan Madaxweynaha Somaliland Md Axmed Siilaanyo waxa uu yidhi haddii shirkaasi yahay mid la mid ah shirarkii hore ee lagu qabtay London iyo hadii uu yahay kii lagu qabtay Immaaraadka Carabta oo macnaheedu yahay laba Dal oo isku mid ah Somaliland sidii caadada ahayd shirkaas Somaliland way ka qayb-galaysaa hadiise Shirkaasi yahay mid u gaar ah Soomaliya oo loo qabtay iyaga,kaas Somaliland kama qayb-galayso, waana arrin cad oo aan u baahneyn wax mad madow ah.,”Ayuu yidhi Wasiiru-dawlaha Wasaaradda Maaliyada Md. Cismaan Cabdillaahi Saxardiid (Cadaani).
Wasiir Cadaani oo ka hadlaya aragtiyaha is-khilaafsan ee Xsibiyada Mucaaradka ka dhiibteen go’aankii madaxweynuhu ku qaaddacay shirka London, waxa uu yidhi, “Waxa aanu soo dhaweyneyna in Xisbiga Mucaaridka ah ee Ucid uu soo dhaweeyay hadalka Madaxweynaha uu shirkaasi ka qayb-galkiisa ku sheegay in aanay Somaliland ka qayb-gelidoonin waana arrin iska cad. Ciddii kale ee laakiin ka baayac mushtaraynaysa arrinkaas ee Mucaaridad ka dayaysa ee dooneysa inuu hadalka Madaxweynaha saafo oo nooc kale ka dhigo, waxaanu leenahay waa wax cad oo Ummadda Reer Somaliland-na way wada fahansan tahay, labana iskuma heli karaan; inay kolna yidhaahdaan Shirka Soomaaliya yaan laga qayb-galin waxa uu u gaar yahay Soomaaliya, marka Madaxweynuhu uu go’aan ka kaadhay ay ka hor imanayaan.”
Wasiiru-dawlaha oo arrimahaas ka sii hadlayaana waxa uu sii raaciyey hadalkiisa, “Anigu garan maayo waxa looga jeedo talo qaran waayo talo qaran Madaxweynaha Somaliland ayaa ummaddu u dooratay inuu dalka Siyaasadeeda hago mid gude iyo debadeed-ba, in waraaqo Martiqaad Madaxweyne Axmed Siilaanyo Xafiiskiisa soo gaadheen Inan yar oo Af-hayeena ma ogaan-karo. Waayo aniga laftaydan ayaan Warqadan ogayn, laakiin in Madaxweynahu Siyaasad cad arrintaasi ka cadeeyay in hadii labada dhinac aanay si is ku mid ah uga qayb-galayn oo aanay labada Madaxweyne ee Somaliland iyo Soomaaliya aanay Go,aano isle’eg ka wada qaadaneyn, waxa uu Madaxweynahu sheegay in aan Shirkaas Somaliland ka qayb-galidoonin.”
Somalilandpost.net/Hargeysa
