Farxaddu waa shayga ugu qaalisan ee nololsha bini aadamka qaabayn karata, qiimeyna u yeeli karata,waa shay ay yar tahay cidda ku siinaysa,kuuguna deeqdaa .
Cidi kuuma hurto farxad dhab ah kumana siiso ee way kuu suura gelisaa farxadda,marka aad Aragto ama la kulanto dadka farxadda kuu hor seeda waad u nayaayirtaa la kulankooda, la joogooddana waad jeclaystaa nolosha waxaad ku noolaataa farxad iyo feker la´aan sidaad aniga iigu noqoteen farxad weyn oo noloshayda saamayn ku leh waxaad istaahishaan ood iga mudan tahiin inaan idiin ahaado adeege nolosha dhan walba ah, waayo waxaad ii suura geliseen maalin iyo maalmo badanba inaan farxo noloshana kula deris ahaado dhoola cadayn joogto ah.
Maan dhoola cadeeyeen hadaydaan garabkayga ahayn gaashaanna iiga noqon waayaha nolosha Waxaad ii weleyseen weedho dhaxal gal ii noqon kara ha ugu horayso waano iyo wanaag joogto ah.
Waxaan la deris ahay farxad aad abuurteen waayo badan ka hor wanaag iyo weedh celin wanaagsan inaan idinla wadaagaa idinkaa weelaystay. Farxaddaad i siiseen waxay ila deris ahayd ilaa waqtigan oo ka mida waqtiyada noloshayda ugu qaalisan .
Waxay ii noqotay warmo nolosha igu weheliya iina noqda gashaaan igu gedaaman waayaha noloshana wehel iiga noqdaWay adag tahay inaan weedh keliya idiinku mahad naqaa, waaayo waxaan ogahay sidaad wehel iyo walaal iyo waalidba iigu noqoteeen iigana war haysaaan weligiin.
Waxaad ii suura geliseen inaan farxsanaado farxaddna la wadaago dadka iyo dalkaan joogaba uguna noolaado si hammi sare leh hiigsina ka lahaado qaybaha nolosha ee kale. Waxaan ku Noolahay oo la noolahay weydiinta ,waannada iyo weedhaha wanaagsan ee aad ila wadaagtaan waagii beryaba waxaan aad ugu riyaaqaa rayn rayna ii ah inaad noqteen oo Alle iiga kiin dhigay dadka aan ku daydo tusaalyn iyo taakulaynna iigu filan.
Maalin ka mid ah maalmaha noloshayda kamaad bixin maaankayga , miyirkayguna idinkuu Idinku soo maqnaa waxaan maalayey maalin uun inaan idiinla wadaagi doono midhihii aad Beerteen waayo badan ka hor noloshayda waxaad i geliseen iina suura geliseen inaan farxad la jaar ahaado, joogteeyana dhoola cadaynta iyo dhiiri gelinta hadafkayga. Hadaf maan lahaadeen mana haybiyeen hadaydaan garbkayga ahayn iiguna dhiirrinayn inaan nolosha mansab iyo meelba ka gaadho.
Waxaan amaantan iyo odhaahdan u hibeyey muquunana uga dhigay waa labadayda garab, gashaan ee mar walba iyo meel walba igu gedaaman iina ah suurta geliyaha nolosha. Dhiirrigeliayaha waxyaabaha dhiman ii hura hantidoodaa haybtooda, hayntooda iyo haybadoodaba intaba. Qoraal idinkuma qiimayn karo sidaad qaali iigu tahiinna iiguna qiimaysan tahiin noloshaydana nalka ugu daarteen, ii bidhaamiseen nolol haybad leh inaan helo. Waxaad ii ahaydeen hadna ii tihiin laba mudan inaan milgeeyo maamuso magacoodana kor u qaado. HOOYO iyo AABE waxaan idinku qiimeeyo qoraal kuma koobi karo .Alle janada haydinku abaalmariyo hana idinku arsaaqo midhaha janada.
W/Q:Muna Qoorsheel
E-Mail: munaqoorsheel@hotmail.com
