Hargaysa(SLpost)-Xoghayaha warfaafinta xisbiga Mucaaradka ah ee Waddani Cabdiraxmaan Yuusuf Ducaale (Boobe) ayaa xukumadda ku naqdiyay wax ka qabasho la’aanta wariye todobaadkii dhammaaday lagu garaacay magaalada Burco. Waxa uu bulshada uu ka soo jeedo wariyuhu ugu baaqay Mr Boobe inaanay wax talaabo ah qaadin maadaama xukumaddu talaabo ka qaadi wayday cidii falkaasi gaysatay.
Wariye Axmed Muuse Sakaaro ayaa Arbacadii la gaadhsiiyay nabaro loo adeegsaday bud “Sidaanu warka ku hayno afar nin ayaa gaadhi ka soo degay dabeedna nin la yidhaahdo Axmed Muuse Sakaaro oo wariye ah ayaa budka lagu boobay, shaashadaha ayaa la soo dhigay isagoo dhiigu ku shaxan yahay dharkiisii, isagoo dhawr nabar qaba. Waa Arbacadii, khamiis, jimce iyo maanta oo Sabti ah ninkaasi sidaas ayuu u dhaawacan yahay oo aan waxba laga qaban arrintiisa,” ayuu yidhi Xoghaye Boobe.
Mudane Boobe Yuusuf Ducaale wuxuu ugu baaqay hay’addaha ammaanka iyo maamulka heer gobol iyo degmo ee Burco inay soo qabtaan cidii falkaasi gaysatay
“Dee ha la soo qabto ma dadkaa la isku dilayaa, mee maayarkii magaaladu, dhacdadaasi maanay ka dhicin magaalada aad madaxda ka tahay? Mee badhasaabkii shaashadaha taagnaa? Maxaa hadhay ma cidluu ka dhashay ninku saw reer kamuu dhalan, saw lama doonayo uun in labada reer isku baaba’aan? Mee taliyihii bilayska ee halkan ka doobinayay een afhayeenka lahayni? Xukumadda waxaan faraynaa dadka ha isku dilina ee kala qabta,” ayuu yidhi Mr Boobe.
Ugu dambeyn wuxuu farriin u diray Boobe bulshada uu ka soo jeedo wariyaha la jid dilay “ Beesha ninkaasi ka dhashay waxaanu magan idiinka nahay inanku wuu idinka dhashay laakiin, wuxuu ka tirsan yahay bahda warbaahinta, beesha aad moodaysaan mid ka weyn ayuu ka tirsan yahay, mid ka awood badan buu ka tirsan yahay, mid ka qalab badan buu ka tirsan yahay, laga bilaabo saacaddaas wixii aynu qalab haysanay ayaynu adeegsanaynaa, waxaanu magan idiinka nahay inaanay odayaashaasi shir jaraa’id qaban, inaanay arrinta gacanta ku qaadan,inaanay odhan waanu soo aarsanaynaa, arrintaasi dawladda ayay u taalaa, haddday wax ka qaban weydo bahda saxaafadda ayay u taalaa,” ayuu yidhi Mr Boobe.
Geesta kale Gudomiyaha Gobolka Togdheer Maxamed Muuse Diiriye, ayaa dhacdadaasi mid fool xun ku tilmaamay
“ Dhacdadii Suxufi Axmed Muuse Sakaaro aad iyo aad baanu uga xunnahay. Dhacdo fool xun ayay ahayd oo aan loo dulqaadan Karin, tu aan hore inoo soo marin ayay ahayd in inta qof suxufi ah intay cidi u timaado uun ku istaadho, waa la xidhi jiray oo hagar daamo kale way la kulmi jireen dawladdan uun maahee dawlad walba laakiin, dhacdo aan loo dulqaadan Karin ayay ahayd,” ayuu yidhi badhasaabku.
Guddoomiyuhu wuxuu sheegay inaan wali lahayn cidii falkaasi gaysatay balse odayaashoodu u xidhan yihiin “ markii arrintaasi saxaafadda soo gashay ee la ogaaday amar baan ku bixiyay in la soo qabto cidii waxaas ka dambeysay. Waxa ii muuqata inaan ilaa hadda la hayn cidii falkaas gaysatay. Dhaqan baynu leenahay oo wadooyin bay maraysaa, markaa ehelkoodii baa u xidhan arrintan dadkii gaystay, waxaa ka mid ah jiif caaqilkii, ilaa 5 qof baa xidhan. Iyagu dhib may gaysan laakiin, dhaqan ahaan inankii keena ayaanu leenahay ilayn guryihiina ayuu ku jiraaye Jarmal muu tagine, waana la soo qaban doonaa ha dhawaato ha dheeraatee,” ayuu yidhi Badhasaabku
Somalilandpost, Hargeysa Office
