Ciise Cabdi Ducaale, waxa uu baarka ka jaray da’da todobaatameeyadda. Waa haasaawe ruug, aftahamo xeel dheer leh. Waa dhaqan aqoon gaaso-baxay oo bulshadda iyo gedihiisuba ay afkiisa uun dhawraan. Ma hadal badna laakiin wuxuu marka uu wax ka hadlayo gudbiyaa ereyo kooban xikmad leh oo maadi ku lammaan tahay.
Ciise waxa uu degan yahay magaaladda Hargeysa, allaaba waxa uu galabtii asxaabtiisa kula qaataa mukhaati shaah macaan oo ku taala xaafadiisa meel aan sidaasi uga sii fogayn. Inkasta oo aanu aqoon maadiya lahayn, haddana waxa uu ka mid yahay dadka hibadda eebe u siiyay aqoonta dabiiciga ah. Wuxuu u soo joogay waayo- iyo maalmo badan oo ku taxnaa nolashiisa oo ka dhigay inuu noqdo waayo arag buuxa.
Oday Ciise isagoo ka khax-waynaya goobtaasi uu laasimay ayaa waxa isaga iyo saaxiibaddii ku soo dhacay war dhiile leh. Kuye’ waxa xalay inantii ina hebel hebel oo maraysay goob heblaayo helay niman dhalinyaro ah oo balwad ka dhigtay inay Haweenka iyo dadka nugul ka qaadaan Mobile-da cawayskii. Waxa loo sheegay in inantaasi nabaro wajiga laga gaadhsiiyay, handadaad ka dibna Telefoonkeedii gacanta si argagixiso ah looga faro-maroojiyay.
Ciise iyo Saaxiibaddii iyagoo isla galabtaas aan goobtiiba ka kicin ayaa haddana nin meesha soo fadhiistay uu u sheegay inay habeen hore niman dhalinayaro ah oo mindiyo daab weyn ku hubaysani ay gacanta kaga dhufteen mindi. Isla markaana ka qaadeen Telefoonkiisii gacanta xili uu marayay 11 cawaysnimo meel xaafaddo dhexdood ah. Haddii odayaashii meheradaasi fadhiyay ka amakaageen dhaqan budhcad dariiqeedkan ku soo batay magaaladda Hargeysa ayaa mid waliba habaar iyo haaraan ay iskugu dareen kooxdan bulshadda ciishay. Waxay isla garteen in iyagoo ciidammadda booliska lala kaashanayo ay ka hawl-galaan sidii dhaqankan xun loo suulin lahaa.
Cabaar haddii ay wad-wadeen odayaashaasi sheekadda arrintan oo uu Oday Ciise-na uu aamusnaa intaasi oo dhan. Ayuu inta uu mar dambe soo hambabaray wuxuu si kadis ah isagoo gacantiisa dhabanka ku haya uu ku tiraabay “Waxa inantii laga sheekeeyay iyo ninkan inala fadhiyaba helay Xildhibaanaddii!.”
Ciise Saaxiibadii yaabe waxaanay si hal-haleel ah inta ay qosleen ugu jawaab celiyeen “Xildhibaano Maxay ah?,” ka dibna inta uu qadar kooban aamusay ayuu ugu hal-celiyay. “Waxaan uga jeedaa dhalinyaraddan 25 jirku ugu weyn yahay ee dariiqyadda dadkooda ku dhibaya ee hablaha iyo dadka waaweyn mindiyaha u soo tuntay ee dadka laynaya isla markaana Mobile-da ka qaadaya. Waa raggii aan ku waday inay Goleyaasha qaranka galaan ee madaxweynaha iyo Goleyaasha Baarlamaanku shuruucdii dalka u fureen si fursad loo siiyo.”
“Aheey…. Ah! Waxa tacab khasaar taagan Goleyaashii u fadhiistay iyo Madaxweynihii kuwan Mobile-da qudha ku jaraya xeerarkii u furay. Waar waxaan macnawiyan idin idhi dadkaas waxa helay Xildhibaanaddii,”ayuu yidhi Oday Ciise, ka dibna waxa goobtii hadheeyay qosol gariir ay dadkii goobtaas fadhiyay iyo kuwii ka ag-dhawaaba ay kuraasta ka dhaceen.
Waxgaradkaasi Waxay isla garteen inay jiraan dhalinyaro wanaagsan oo dhaqan iyo edaab leh oo aqoon leh oo dabarkan madaxweynuhu ka furay dhalinyaradda fursad naadir ah ay u tahay. kana faa’iidaysan kara wakhtiga u hiiliyay.
Maalintaasi wixii ka dambeeyay goobtii oday Ciise iyo saaxiibadii Bar-kulanka u ahayd waxa looga yaqaanaa tuugta Mobile-da hal-hayska ah “Waa Xildhibaanaddii”
Cumar Maxamed Faarax
