Hargeysa (SLpost)- Xildhibaan Maxamed Xuseen Xaaji Ciise oo ka mid ah golaha wakiiladda Somaliland ayaa ku tilmaamay inay qalad tahay in Komishanka doorashooyinka u cayimo in doorashooyinka madaxtooyadda iyo golaha wakiiladdu qabsoomaan sanadka 2016 oo ay dhacayso doorashadda Soomaaliya.
Waxaanu sheegay in ay lagama-maarmaan tahay in la kala leexiyo mudadda la qorsheeyay in ay dhacaan doorashooyinka Somaliland iyo ta maamulka Xamar oo la sheegay in ay ku beegan tahay sanadka 2016-ka. waxaanu sidoo kale sheegay in golaha guurtidu awood u leeyahay inay qiimeeyaan wakhtiga ay ku qabsoomi karaan doorashooyinka.
Xildhibaan Maxamed Xuseen oo shalay magaaladda Hargaysa ugu waramay qaar ka mid ah warbaahinta, ayaa u soo jeediyay golaha guurtida inay kala duwan wakhtiga ay qabsoomayaan doorashooyinka Somaliland iyo Somalia, maadaama oo aynu kala nahay laba dal.
“Golaha guurtida ayaa awood u leh inay qiimeeyaan wakhtiga lagu qaban karo doorashooyinka, dastuurka ayaana awood u siiyay Komishanka doorashooyinkuna talo ayuu soo jeediyay oo wuxuu yidhi muddo hal sano ah ayaan ku qaban karnaa doorashooyinka, markaa waa in golaha guurtida la qiimeeyaan sanadkaa in Komishanku doorashooyinka doorashadda ku qaban karo iyo in ay ka badnaan karto iyagoo duruufo badan eegaya” ayuu yidhi xildhibaanku.
Xildhibaanka oo hadalkiisa sii watay waxa uu yidhi “Waxaa jirta, oo iyadna taasi ka daran Soomaaliya waxa doorashadda ka dhacaysaa 2016, waana qalad in isku mar doorashaddu ka dhacdo Somaliland iyo Soomaaliya.
Waana in la kala duwaa Komishankuna halkaa kamay fiirsan waxaanan leeyahay guurtidu waa inay dhaafiso doorashadda Somaliland wakhtiga doorashadda Soomaaliya oo isku mid ma nihin Soomaaliya.
Waanay ku degdegeen Komishanka wakhtiga ay doorashadda u cayimeen guurtida ayaanan ka sugaynaa wakhtiga doorashadda dhacaysa”.
Dhinaca kale xildhibaan Maxamed Xuseen waxa uu sheegay inay weli qabyo yihiin xeerarkii lagu soo dooran lahaa goleyaasha wakiiladda, guurtida iyo kala xadayntii gobolada iyo degmooyinka dalka. Waxaanu tilmaamay in arrintaasi saamayn ku yeelanayso doorashadda.
Isagoo arrimahaasi ka hadlayayna waxa uu yidhi “Waa qabyo xeerkii lagu soo dooran lahaa golaha wakiiladda iyo guurtida, waxa kale oo qabyo ah kala xadayntii gobolada iyo degmooyinka dalka oo gobolo cusub ayaa la magacaabay oo lama garanayo in doorashaddu ka dhacayso iyo in kale, saamayn ayaanay ku yeelanayaan doorashadda waxyaabahaas oo dhami”.
Somalilandpost.net
