Nairobi (SLpost)- Telefishanka Al-Jazeera, ayaa soo bandhigay dokumentiyo Caddeymo u ah iyo Xog-warran Saraakiil Booliska dalka Kenya oo badka soo dhigay shir-qoollo ay iska kaashadaan Sirdoonnada Kenya iyo Kuwa Reer Galbeedka, kuwaas oo lagu khaarajiyo Culimada Islaamka ah ee ku dhaqan dalka Kenya, iyada oo sannadihii u dambeeyey dalka Kenya lagu laayey wadaaddo caan ka ah oo lagu eedeeyey inay taageeraan kooxda Al-Shabaab.
Culimada ku dhaqan dalkaasi Kenya, ayaa qaarkood lagu eedeeyey inay taageeraan kooxda Al-shabaab ee ka dagaalanka Somalia, waxaana dacwado eedaheeda ka tarjumaya lagaga oogaa maxkamadaha dalkaas oo muddo ku gudo-jira baadhitaanno iyo caddaymo loo raadiyo dambiyada loo haysto, haseyeesehee marka ay maxkamaddu wax dambi ah ku weydo isla markaaana xorriyaddooda loo soo celiyo, waxa ay ciidamada Booliska Kenya ka hawl-galaan sidii toogasho qarsoon loogu khaarajin lahaa culimada oo ay ku tilmaameen qaar khatar ku ah ammaanka dalkaas, iyaga oo taageero ka helaya Sirdoonka dalalka Israa’iil, Ingiriiska iyo Maraykanka oo si xooggan uga hawl-gala Kenya. Waxaana shir-qoolladan labadii sanno ee u dambeeyey lagu fuliyey Dhowr wadaad oo si weyn looga dhex-yaqaanno bulshada Muslimiinta ah ee Kenya oo la tilmaamo inay boqolkiiba 10 ka yihiin Shacbiga waddankaas.
Qaar ka mid ah Saraakiisha Afar Kooxood oo ka mid ah Waaxda La-dagaalanka Argagixisada ee dalka Kenya oo la hadlay Barnaamijka Waaxda Daba-galka ee Telefiishanka Al-Jazeera, ayaa markii ugu horeysay qirtay inay Bileyska Kenya Khaarajiyaan dad la tuhunsan yahay, kadib marka ay amarto Xukuumadda Kenya.
Sarkaal ka tirsan Waaxda Bilesyka ee la-dagaalanka Argagixisada ee Kenya (ATPU) ayaa u sheegay Telefiishanka Al-Jazeera in amarka khaarajinta shakhsiyaadkaasi uu ka yimaado ama ay soo bixiyaan Gole Qaran oo la yidhaahdo Golaha Ammaanka Qaranka Kenya.
Madaxweynaha Dalka Kenya Uhuru Kenyatta iyo xubnaha ka midka ah Golaha Ammaanka Qaranka ayaa beeniyay inuu jiro barnaamij khaarajin ah oo ka sareeya garsoorka dalkaas.
Falalkan Khaarajinta ah, ayaa sida ay sheegeen Saraakiisha Waaxda ATPU, waxay sannadkii gaadhaa in la khaarajiyo boqolaal qof. “Maalin markaad dhaaftoba waxaad maalinta xigta maqlaysaa khaarajin lagu sameeyay dad la tuhunsan yahay. Waxaa loo adeegsadaa Bileyska laftiisa, waxa kale oo aanu haysataa kooxaha gaarka u tababaran ee ay ka midka tahay kooxda GSU. Iyadoo aanan hayn wadarta guud, waxaanse ku odhan karaa dadka ilaa hadda la khaarajiyay waxay ku dhawaanayaan ilaa shan boqol oo qof (500)” ayuu yidhi Sarkaalkani.
Barnaamijkan lagu baahiyay Telefiishanka Al-Jazeera habeen hore, ayay Saraakiishani shakhsiyan u qirteen inay iyaga laftoodu gacantooda ku khaarajiyeen ama ku dileen dad la tuhunsanaa. Sarkaal ka tirsan Waaxda Adeega Guud ee shirkadda Ammaanka ee Recce (GSU) ayaa telefiishanka Al-Jazeera u sheegay oo yidhi: “Tan iyo intii layga shaqaaleeyay Waaxdan, waxaan gacantayda ku dilay ilaa konton qof (50), waanan ku faanayaa sababtoo ah waxaan ka takhalusay dhibaatooyin.”
Saraakiishani waxay ku doodeen in taagdararidda Garsoorka Kenya uu ku khasbay inay fuliyaan hawl-galladan khaarajinta ah, ka dib markii ay bileyskuna ku fashilmeen inay keenaan cadaymo xoogan oo lagu maxkamadayn karo dadka lagu tuhunsan yahay argagixisada, waxaana ilaa hadda la rikoodh gareeyay kiis keliya oo eeddii lagu helay.
HALKAN KA DAAWO WARBIXINTA