Addis Ababa (SLpost)- Dawladaha Sudan iyo Koonfurta Sudan, ayaa si wada-jir ah shalay heshiisyo dhinaca dhaqaalaha iyo ammaanka ku saabsan ku gaadhay magaalada Addis Ababa oo dhowrkii maalmood ee u dambeeyey wada-hadallo lagu dhex-dhexaadinayaa uga socdeen.
Madaxweynayaasha Labada dal ayaa saxeexay Heshiisyo nabadeed iyo mid dhinaca dhaqaalaha ah kuwaas oo u ogolaanayo Koonfurta Sudan in Shidaalka ay soo saarto si toos uga dhoofiso Dekedaha dalka Sudan. Labada dal waxa kale oo ay ku heshiiyeen inay ciidamadooda kala baxaan dhulka lagu muransan yahay iyo in la baajiyo cadaawadaha u horseeday inay labadan waddan ku sigtaan dhowr bilood ka hor isku dhac milatari oo dhexmara.
Madaxweynaha Sudan Omar al-Bashir iyo Koonfurta Sudan Salva Kiir oo wada-hadalladooda markii hore loo qoondeeyo hal maalin inay socdaan, waxa ay isku af-garan waayeen in heshiis buuxa laga gaadho dhinaca xuduudka u dhexeeya labada dal gaar ahaan gobolka lagu muransan yahya ee Abyei.
Labada dhinaca ayaa heshiiskoodani yimi ka dib markii ay cadaadis xooggan kala kulmeen Golaha ammaanka ee Qaramada Midoobay oo ku dirqiyey inay heshiis ka gaadhaan qodobbada la isku hayo haddii kale ay la kulmi doonaan Cunaqabatayn dhinaca Dhaqaalaha iyo Dibloomaasiyadda ah.
Koonfurta Sudan waxa ay Sudan ka go’day sannadkii hore ka dib markii shacbiga Koonfur Sudan laga qaaday Afti Madaxbannaanidooda lagu weydiiyey taas oo noqotay midhaha laga goostay heshiis nabadeed oo sannadkii 2005 lagu soo gunaanaday dagaallo tobanaan sanno socday oo ay ku dhintay in ka badan 2 milyan oo qof. Haseyeeshee, qodobka ugu xaasaasisan ee aan lagu heshiin ayaa ah dhinaca xuduudka, bishii January ee sannadkan ayay Koonfurta Sudan hakad gelisay wax-soo-saarka Saliidda ka dib markii ay ku eedaysay Dalka Sudan inay si hoos u xadayso Saliiddooda Qaydhin oo dhuumo lagaga dhoofinayey Sudan. Isku dhacyada dhinaca xuduudda ayaa cirka isku shareeray Bishii April ee sannadkan markii milatariga oonfurta Sudan la wareegay gacan ku haynta magaalo qani ku ah saliidda oo ku taala gobolka Sudan sheegato lahaanshiyaheeda.
Heshiisyada la saxeexay maalintii Khamiista, masuuliyiinta labada dhinac waxa ay soo qaadeen in Arrimo Farsamo ka dhiman yihiin dhinaca dhoofinta Saliidda si loo sii ambo-qaado, taas oo qaadan doonta muddooyin bilo ah si loo nadiifiyo dhuumaha shidaalka qaada.
Xoghayaha Guud ee Qaramada Midoobay Ban Ki-moon ayaa soo dhaweeyey heshiisyada la gaadhay, “Sudan iyo Koonfurta Sudan, waxa ay bog u fureen taariikhdooda ay wadaagaan,” ayuu yidhi Ban Ki-moon.
SOMALILANDPOST.NET
webmaster@somalilandpost.net
